إسعاد يونس
وتابعت: أهو يعنى كنا بنتجاذب أطراف الحديث عن مشاكل الأقليات فى أقاصى أقاليم جنوب مانجوليا.
المهم واقفين فى المطبخ وهى بتقلى فى بطاطس وفراخ بانية وبتسلق فى مكرونة وصلصة حمرا وصوص أبيض ومشروم، أبص فى الساعة ألاقيها 8 الصبح وماحدش يسأل بعمل إيه عندها الساعة 8 الصبح، لأن مش دى المشكلة أساسًا.
المشكلة أن فى مكرونة بصلصة وفراخ بانية وبطاطس مقلية وصوص أبيض بيتعملوا الساعة 8 الصبح أصلًا، المهم الشابة لاحظت الانبعاج الواضح فى ملامحى ومليون سؤال من اللى بيطنططوا فى وشى، قالتلى لا لا متقلقيش مابنتغداش 8 الصبح، دا عشان اللانش بوكس بتاع دودى.
دودى! الواد الشبر وأقطع اللى فى مراحل ما قبل الحضانة التعليمية بتعمليله منيو الكولسترول الخام دا على الصبح، أعمل إيه كل أصحابو فى الحضانة أهاليهم بيعملولهم كده، وبيرجع يعيط يا أما ما يكولش، كل العيال فى الحضانة بيعملوا فيهم كده! لما العيال فى الحضانة بيدولهم على غيار الريق بانية ومكرونة أومال مع الابتدائية هيخدوا إيه! برام رز معمر وبطة محمرة فى السمنة وعلبة مورتة على سبيل السلطة! إيه يا خويا العادات الغذائية اللى ما يعلم بيها إلا ربنا اللى بننقلها للعيال دى!
يعنى الوجبات الغذائية السريعة وقولنا معلش أهى مرة فى الأسبوع ولا لما العيال تخرج تتفسح مش مشكلة، لكن يبقى اليومى والعادى والتغذية اللى العيل بيتغذى عليها تشكيلة كولسترول ودهون ومقليات! يانهار أحوس، دا العيل ميكملش معانا لـ3 أعدادى كده منغير قصور فى الشرايير على حبة جلطات، بعيد الشر يعنى عن عيالنا وعيال السامعين، بس أحنا كده بنقضى عليهم، أه والله زيمؤلكم كده.
أومال فين زمن السندوتشات الجميل، فين الجبنة الرومى، وسندوتش الجبنة البيضة والمربى والحلاوة، دا يوم ما كان بيتحط فى الشنطة سندوتش بيض بالبسطرمة دا كان بيبقى عجبة، فين علبة العصير ولا اللبن؟ فين فكرة الواجبة المتوازنة أصلًا؟
الموضوع مش واقف عند أكل العيال فى المدارس، الموضوع أن عاداتنا الغذائية إجمالًا بقت حاجة مايعلم بيها إلا ربنا، بداية من اختفاء فكرة الوجبات الأساسية أساسًا بسبب ظروف الشغل والدراسة، بقى أى حاجة تطولها إيدنا كده ندلوقها على زورنا كده منغير ما نفكر هتنفع ولا هتشفع، علب وأزايز المياه الغازية والصودا بقت فى إيدنا كده بدل كوباية الميه!
الوجبات السريعة والجنك فود بقى هو الوجبة السخنة اللى ممكن نكلها فى يومنا! واستبدلنا بطبق الخضار والسلطة وحبة الرز وحتة اللحمة بتوع البيت! الأكياس اللى بتلمع فى إيدنا وإيدين عيالنا ليل ونهار وظهر وعصر ومغرب وعشا، إيشى أكياس بطاطس على أكياس مخبوزات على حاجات بتقرمش وحاجات بتطرقع وحاجات معسلة وحاجات مملحة، مجموع تمن الحاجات اللى بنحشى بيها جوفنا علشان نجوع أكتر من الأول بدل ما نشبع ممكن يملا التلاجة خضار وفاكهة وبروتين نباتى وحيوانى 3 مرات فى اليوم، ومع ذلك مستمرين فى حشى معدتنا ومعدة عيالنا كميات مقليات ومواد حافظة وملح وكولسترول خام وباقى البلاوى.
البلاوى دى اللى بتجرى تستخبى فى الأوعية والشرايين أو تجرى تستخبى فى الفخاد أو الجناب والكروش والدراعات، وتحولنا إلى بلونات بشرية تزحف على الأرض من أعباء الكوارث اللى بنعب بيها جسمنا، أيوه والله زى مبؤلكم كده.
سلوكنا الغذائى إجمالًا محتاج مراجعة ومراجعة ومراجعة المراجعة بسرعة كمان، مش ممكن اللقمة اللى تكون بنحطها فى بوقنا وبوق عيالنا بدل متسرى وتمرى نخليها تهرى وتكوى، آه والله زى مبؤلكم كده.