إسعاد يونس
شوية كده والستات اتلموا على بعض وهات يا أكل فى ودان بعض، والرجالة اتلموا على بعض وهات يا أفش وصوت عالى، والعيال اتلموا على بعض وهات يا لعب.
وأضافت: اسيبلك نميمة الستات حبة كده وأبص حواليا أتابع مجريات الأمور، ألاقى الحتة اللى فيها العيال مش طالع منها صوت، اتربينا أن العيال لما بيتلموا على بعض وميطلعوش صوت يبقوا هيطلعوا ريحة، آه والنبى زى مبؤلك كده.
لا لا مخكوا ما يروحش لبعيد مش ريحة من اللى بالكوا فيها، ده هيبقى فى مصيبة يعنى، يعنى يا هنلاقى حريقة يا هنلاقى أجزاء بشرية بتتحدف علينا، يا هيلعبوا البخت فى عيون بعض.. المهم قلبى كلنى على العيال، قلت يا بت قومى وبصى بيعملوا إيه، أبص عليهم الاقيهم قاعدين ساكتين! يوه 9 عيال بين أطفال ومراهقين ونص نص قاعدين دايرة فى قلب الجنينة مش بيبصوا لبعض حتى، كل واحد مطلع تليفونه ودابب عينه فيه ولا حاسس باللى حواليه ولا حاسين باللى قاعدين معاهم، أنده عليهم محدش عبرنى، أخيرًا واحد رفع عينه من البتاع ده وقاللى: "سورى يا طنط أصلى بنزل لعبة جديدة"، لعبة إيه يا عيال وأنتوا مع بعض ما تلعبوا سوا كورة ولا باسكت بول.
ردت بت تانية لا يا طنط أصل أنا مش بحب الألعاب دى، يا نهار أسود العيال مش عارفين أصلا أن فى لعب غير اللعب الديجيتال بتاعهم ده، العيال قاعدين فى الهوا والشمس وفكرتهم عن اللعب هى اللعب أون لاين، ينهار أزرق، آه والله زى مبؤلك كده.
امتى سيبنا عيالنا يفقدوا روحهم ليه سلمناهم تسليم أهالى للسوشيال ميديا، ليه استنينا لحد ما علاقتهم بالشاشات بقت أقوى من علاقتهم بالبشر، طب إحنا على الأقل عيشنا سنين حلوة لا كان فيها شاشات ولا سوشيال ميديا أصلا، التليفزيون أصلا كان عجبة واختياراته محدودة جدًا بين 3 قنوات بالكتير، قوم وقعنا ولعبنا فى الطين وركبنا عجل ونطينا الحبل وخربشنا بعض وشدينا شعور بعض واتصالحنا وغنينا وشوطنا طوب وعملنا اللى نفسنا فيه وإحنا فى سنهم، ومع ذلك بنقول الميديا بتاخدنا وبتبعدنا عن الواقع وقلقانين على نفسنا رغم رصيد التعايش الضخم اللى بينا، أومال الجيل اللى طالع عن انعدام التواصل البشرى والمباشر من أساسه ده هيكبروا يبقوا إيه، علب تلاجه محطوطين جنب بعض لا ليهم علاقة ببعض ولا فارقين مع بعض أصلًا ولا حاسين ببعض يتملوا جبنة زى ما يتملوا صلصلة، أدوات استقبال بس، اللى تديه السوشيال ميديا يتملوا منه والسلام، زى ما بقولك كدة.
لكل أب وأم شايفين أن أسهل طريقة للتخلص من زن العيال هو حدفهم جوه الشاشات أنتوا ببساطة بتسحبوا من عيالكم سنين طفولتهم وبتسحبوا من أرواحهم لمعتها وبتسحبوا من عينيهم شغفهم بالدنيا اللى بجد، مش الدنيا الباردة اللى بتتحرك قصادهم على الشاشة.. فوقوا.
