دولة الميكروباص

قالت الإعلامية إسعاد يونس:"هل تعلم عزيزى المواطن، أنه فى جنبات وطننا العامر، فى دول صغيرة لها حكم ذاتى؟ أه والله زى مبؤلك كده".

وأضافت فى برنامجها "زى مبؤلك كده" المذاع على الراديو 9090: "بس استنوا محدش مخه يروح لبعيد، لأن الدول دى بعيدة كل البعد عن نظرية المؤامرة، والخيانة العظمى، والشرق الأوسط الجديد والقديم، والنص نص".دى، دول وطنية بس هى استقلت بنفسها، ما استقلتش عن البلد بس! لا دى استقلت عن الكوكب كله، وعن المجرة بحالها كمان، ألا وهى إيه بقى؟ "دولة الميكروباص".

وتابعت: "الميكروباص المصرى دول، وأقاليم مستقلة بذاتها، ماشية على الأراضى المصرية، هو الميكروباص فى قاهرة المعز، والمشروع فى الثغر، و"الماكروباظ" فى بعض كتب التراث.

بدخولك الميكروباص، فأنت فى دولة كاملة متكاملة، ليها حدودها اللى بيحميها ويزود عنها الحاكم، ونائب الحاكم، ودول بيمثلوا السلطات الـ3 فى الدولة، الحاكم هو السواق حفظه الله، ونائب الحاكم هو التباع بارك الله فى صوته".

إسعاد يونس أكملت: "القوانين بيسنها الحاكم وبيتابع النائب تنفيذها بكل دقة، صاحب الجلالة لما يقول 4 ورا، كلمته ما تنزلش الأرض أبدًا، إنشا الله يكون اللى راكبين ورا دول مصارعين سومو، بس برضوا هيعقدو 4، زى مبؤلكو كدا".

وزى أى دولة الميكروباص فيه مواقع إستراتيجية، يعنى جنب السواق مثلًا ده موقع إستراتيجى، لا يناله إلا فئة يختارها السواق تبعًا لمجموعة معايير هو اللى بيحددها، وبيعتمد على الفراسة عادة فى الاختيار ده.

جنب الشباك ده موقع إستراتيجى بس مش دايمًا أحسن موقع، لأنك ممكن تبقى فى مهب الرغبات، "معلش أصلى عيان.. اقفل الشباك"، "باشا الدنيا حر افتح الشباك"، "معلش يا أخويا الواد بيستهوا اقفل الشباك"، "معلش لامؤاخذة الريحة بس. افتح الشباك".

فى كمان المواقع غير الإستراتيجية أو تقدر تقول إنها العشوائيات بتاعة الدولة دى، وبتتضمن بقى الكنبتين اللى ورا، والكرسيين اللى بيتقفلوا ويتفتحوا، وده بسبب التكدير فى الدخول والخروج، وفى موقع يعد هو الأسوء فى الدولة كلها.

ده بقى بيكون إيه؟ أول كرسى فى أول كنبة، اللى بيحتل الموقع ده بيتحول تلقائيًا لوزير المالية فى الدولة، مطلوب منه يجمع الإيرادات، ويسلمها للخزانة، ويراجع العجز فى الميزانية، ويعرف مصدر هذا العجز، ويحسب الفرق بين الإيرادات والمدفوعات، ويرجع الباقى أو يسلمهم للدولة، ويستنى الباقى يرجعه للمواطنين.

الإعلام فى الدولة دى بقى، قائم على 3 محاور، محور الروحانيات، وده بيتمثل فى التسجيلات الدينية اللى بتترسخ فى الجهاز الإعلامى للدولة، ومحور المهرجانات والأغانى الشعبية، ودى بتحتل الجهاز الإعلامى لـ99% لكل دول الميكروباص.

اللغة الأولى فى الدولة دى هى "الميكروباصية"، ودى لغة حديثة لها أصول عربية، ولكنها تطورت عن اللغة العربية وبقى ليها قواعدها ونحوها وصرفها وانشقاقتها، ومنها المسموع والمقروء وده بنلاقيه فى صورة حكم ومواعظ، تحتل جدران الدولة داخليًا وخارجيًا، ومنها المشاهد، وده بيجدوه الزباين بقى، فلما تلاقى واحد واقف فى السكة عامل إيده مثلث، فمتستغربش لأن ده بيجيد اللغة الميكروباصية، وعاوز يروح فين؟ "الهرم"، مدام عامل مثلث بإيده يبقى عاوز يروح الهرم.

وبتعتمد اللغة أكثر على التورية والاختزال والاختصارات، وعدد مرادفاتها قليل يعنى، ما بيزدش عن أسامى المناطق بعد تحويرها من كوبرى عبود لـ"عبوء عبوء عبوء"، والمؤسسة لـ "ساسة ساسة ساسة"، كدا يعنى.

والميكروباصية يجيدها نائب الحاكم إجادة تامة، وده شرط من شروط منصبه.

القصد،، الميكروباصات فى بلادنا، واحدة من أكبر الألغاز اللى ممكن تقابلها فى يومك، فى الربع ساعة ولا النص ساعة، اللى بتقضى فيها مشوارك، وهتلاقى حياة كاملة متكاملة، قائمة بذاتها، فيها الحلو والوحش، والنص نص، وألوان من البشر لا أول ليها من آخر، أه لو استفضنا فى الحكى عن الميكروباص، دولة الميكروباص ميكفيناش 3 برامج. أى والله زى مبؤلك كده.