إسعاد يونس
أضافت فى برنامجها "زى مبؤلك كده" المذاع على الراديو 9090: "كتير بحس أن الشعب المصرى قلب على هانى رمزى فى مسرحية وجهة نظر، ومنين ما تقعد مع حد تسأله الأحوال إيه الدنيا هتتظبط يكرمش وشه فى وشك كده ويقولك مفيش فايدة مفيش فايدة، طب والعربية هتتصلح؟ مفيش فايدة، وطب والشوارع ياعم يعنى هتروق؟ مفيش فايدة بقت ترند والله جملة مفيش فايدة دى، وده خلانى شوية محبطة بصراحة حبتين مش طايقة نفسى".
أضافت "هو إيه اللى مفيش فايدة مفيش فايدة، مين اللى قال مفيش فايدة، وهنا قفشت أنا بقى فى السؤال مين أول واحد قال مفيش فايدة، الأسطورة فى الحدوتة دى بتقول أن سعد زغلول زعيم ثورة 19 هو اللى قالها، وهو بيشوف حلم الثورة الشعبية على الملك بينهار قام باصص لصفية مراته كده وقال مفيش فايدة يا صفية، بس للأمانة التاريخية بقى مفيش حد كتب أن الراجل ده قال كده خالص لا من قريب ولا من بعيد، يبقى سعد باشا زغلول برىء يا خونا".
واستطردت قائلة: "أومال مين اللى قال كده الصراحة قعدت أدور وأقدح ذلات فكرى ورمزى وحسنى ولقيت أن ممكن يكون أحمد عرابى زعيم الثورة العرابية قولى ليه بقى أقولك ليه".
وتابعت: "كانت أول ثورة مسلحة بيقوم بيها الشعب ولما اتهزم فيها جيش الشعب قصاد الإنجليز بسبب الخيانة وقف أحمد عرابى وقال مفيش فايدة، بس لا الدين أكد ولا الشيخ محمد عبده أقر بكده قولت يمكن حد من جدودنا الفراعنة قالها فى صفحة يأس، بس مجرد الفرجة على آثار جدودنا بتقول حاجة واحدة أحنا شعب ملهوش حل أومال مين مين يا جماعة".
وتابعت: "السؤال قعد يزن فى دماغى منين مروح بيزن فى دماغى معايا صاحية نايمة بشتغل بعمل أى حاجة فى دماغى، لحد مكونت فى يوم ملتحمة بجماهير الشعب المصرى، وده فى إيه بقى فى لقطة عاطفية نوستالجيا بحتة، الشعب حاضن بعضه أوى كده بكل الحب والرغبة فى الدفا فى مغربية شتا ما يعلم بيها إلا ربنا وده طبعًا كان فين على المحور، مشهد مهيب ولا الأفلام والله".
وواصلت حديثها قائلة: "وأنا فى عز الالتحام بالشعب، قصدى بعربيات الشعب يعنى على الكوبرى، ودماغى ما بين أكسر يمين واخبط اللى جمبى وأخلص، ولا أكسر شمال واحضن السور الخرسان وارتاح، فجأة نزل سواق تاكسى من عربيته وقعد يزعق مفيش فايدة، فجأة نسيت المحور والزحمة والبرد ونط السؤال تانى فى راسى".
وتابعت: "ولأن الشعب هو المعلم زى مقال عمنا جمال عبد الناصر قولت أسال سواق التاكسى يا عم مين أول واحد قال مفيش فايدة، الراجل بصلى بصة حب وشفقة كده تحسه عاوز يقولى يعنى أنت مش عارفة ياختى!، بس لقيته فى نفس الثانية راح قايلى بصى يا مدام أول واحد قال مفيش فايدة الراجل المسؤول عن تطوير شبكة الطرق فى القاهرة، بص على الخريطة كده يمين كده، شمال كده، فوق تحت كده، وبيدور على حل للزحمة قالك أجرب أعمل أنفاق كبارى علوية، كبارى سفلية، وآخر ما تعب قام مطع الخريطة وقايل مفيش فايدة".
وأردفت قائلة: "الصراحة أنا اندهشت بس الدهشة ماسرقتنيش قمت رازعة السؤال اللى بعده، والراجل ده يا عمو فين أراضيه، سؤال التاكسى نظرلى نظره محبة كده أوى وقالى مزنوق يامه مزنوق على الدائرى قبل نازلة المنيب".
وتابعت: "ساعتها بس عرفت أن مش كل الأسئلة ليها إجابات هتريحك، وعرفت كمان أنه فعلًا مفيش فايدة".
