إسعاد يونس
وقالت الإعلامية الكبيرة "المثل الحكيم بيقولك إيه؟ اللى بيته من إزاز ما يغيرش هدومه فى الصالة أبدًا، عيب الله، بيجيى على النفر لقطة كدا، بيشوف كل الناس بيوتها إزاز، كل الناس مكشوفين وعيوبهم ظاهرة وباينة وتسد عين الشمس".
وأضافت: "تلاقى الأبعد ده يفند فى عيوب غيره، ويدقق ويقلب بوزه ويهرى نفسه وهو بيدافع عن الشرف والفضيلة، ولا يوسف بيه فى زمانه، فلان الفاسد، فلانة الكدابة، ده مرتشى وده حرامى، ودول قلالات الأصل، ويحط عباية الشرف والفضيلة على كتفه، ويمشى حامى حما الشرف، اللى بل الندى طرطوره، أه والله زى مبؤلك كدا".
وتابعت: "بس المشكلة إنه شايف بيوت الناس الإزاز، ومش شايف بيته، بيتك إزاز يا بابا، إزاز ولميع وبيبرق كمان، بروبروق بروبروق، وبالمناسبة بقى بتغير هدومك فى الصالة طول اليوم، ودى مشكلة كبيرة جدا على فكرة".
وأكملت: "الفساد اللى شايفه عند غيره، ما يمكن هو كمان بيمارسه بشكل تانى، بس متزوق وحلو، ومسميه اسم لطيف كده، يريح ضميره. المرتشى اللى ممكن يقابله، وممكن يقف يعايره بالعار اللى بيمارسه، ممكن جدا يكون قبل الخطبة العصماء اللى إداها لغيره، لسة مكرمش عشرناية كدا، لأى حد عشان يقضى مصلحته، ولا يخلص ورقة ولا يعدى مخالفة، ويسميها إكرامية، أو حلاوة أو صباح الخير، لا ويزعل ويتأثر قوى لو حكى على الموضوع، ويقولك أصل مافيش حاجة بتمشى فى البلد غير بكدا".
وأضافت: "سبحان الله يا مؤمن، هو أنت تعمل المصيبة وتكررها وتغرز فيها، لحد ما تبقى عادة واعتياد، وبعد كده تقول ما فيش حاجة بتمشى فى البلد غير بكده؟ طب ما أنت اللى أصلتها، وما وقفتش تحمى الفضيلة ليه، لما اتحطيت شخصيًا فى المحك يا نونو؟ ما رفضتش الغلط لما جه عندك ليه؟ سميته سوسن ليه يا كوكو؟ قبلت وحورت وما شوفتش فيه حاجة بطالة ليه يا كوكو، ما كدبوش اللى قبلينا لما قالوا (لو كان الجمل شاف سنمه، كان نط عليه وقطمه)، أه والنعمة زى مبؤلكو كدا".
واستطردت: "بس المشكلة بقى إن فى حالتنا، الجمل عامل نفسه مش شايف سنمه، أو شايفه ومعتبره حاجة لطيفة كده، "كيوت" حاجة "كيرفى" كدا، حتة بروز فى جسمه، مش مشكلة خالص يعنى، إنما عند باقى الجمال عاهة كده، وحاجة "كخ" وميصحش".
وقالت: "على بلاطة بقى، محتاجين كلنا نقف واقفة متينة قصاد المرايا، وبعد ما نعدل القصة، ونعدل الحزام، وندارى الكرش، نقف ونواجه نفسنا، مواجهة صريحة وضيحة وقيحة، أيوة زى مبؤلك كدا، اللى بعمله ده، أنت بتقول لنفسك، اسمه فساد، مااسموش تسليك أمور، اللى بدفعه ده اسمها رشوة، ما اسموش تفتيح مخ، اللى بقبله ده اسمه رشوة، مش عمولة ولا إكرامية، اللى بقوله ده اسمه نفاق وكدب، مش دبلوماسية".
واختتمت: "تجاهلك لمشكلة صاحبك ولا قريبك، اسمه قلة أصل، مش تلاهى، ولو وقفنا بس 5 دقائق قصاد المرايا، وما نعملش أى حاجة غير تسمية الحاجات باسمها هنكتشف قد إيه بيوتنا إزاز، ومش بس بيوتنا اللى إزاز، إحنا شخصيًا من إزاز، وورق وقش كمان، ساعتها، يمكن نقف مع نفسنا وقفة، ونقرر نبطل حاجة من اللى بنمارسها، ومسمينها سوسن عشان نريح ضميرنا، نبطل سوسن الأولانية، ونبطل سوسن التانية، ويمكن نبطل كل السواسن فى يوم من الأيام، وساعتها، البيوت ترجع تستر اللى جواها، ساعتها يمكن نبطل نحدف طوب على البيوت، فكروا فى اللى بقوله ده".
