إسعاد يونس
وقالت إسعاد على الراديو 9090: "تخيل نفسك طفل برىء حلو كدة اسم النبى حارسك وصاينك ويطلعلك كائن، طول بعرض أقرع وشوية الشعر اللى حولين قرعته لونهم أحمر نارى ومناخيره كرة دموية اللون، وحنكه أحمر ولا كأنه واكل سبع عيال، وعينه قد المليم ووشه لونه أبيض من دقيق العيش الفينو ولابس هلاهيل".
وتابعت: "يمد إيده فى حنكه يطلع صف مناديل ملونة ويمد إيده فى جيبه يطلع بعصافير وأرانب ويتشقلب وينط ويقع، المهم أن الكائن المفجع دة المفروض مهمته يضيف السعادة والمرح على مخاليق الله وبالأخص الأطفال".
وأضافت: "ومن هنا نشأ فى الأساس الرعب من المهرجين، أو ما يعرف بالـ" كلاونو فوبيا" مرض يصيب كثير من البشر حول العالم ومنهم مشاهير بترعبوا جدًا من سيرة الكائن المهرج دة، زى الأخ الزميل "جونى ديب" الممثل العالمى بيموت من شكل المهرج".
وأكدت: "المهم أن العقدة دى لما جت حدانا راخرة خدت أبعاد تانية خالص وتوسعت وشملت فكرة الفرح من بابها، "إحنا عندنا اسمها "فرحو فوبيا"، هلع عام جدًا من فكرة الفرحة والانشكاح وبنعتبر أن الضحك فى حد ذاته مقدمة لبلاوى وفواجع وأعاصير ورياح سوداء نتوجس خيفة ونكتأب ونحاسب نفسنا مرتين تلاتة أربعة تسعة إننا فردنا وشنا وضحكنا".
وأوضحت: "عمركش شفت يا مؤمن شعب نهار ما يضحك يقول "خير اللهم أجعله خير؟، عمركش شفت يا مؤمن شعب أقصر شهر فى السنة اللى بيخلص قبل ما يبتدى واللى العالم كله بيستناه عشان فيه عيد الحب والسهوكة نقوم إحنا نسميه "فقراير"؟ وينتظروا بلاوى الكون كله فى شهر الحب اللى مسمينه "فقراير" .
وقالت: "تبقى عايشة ومبسوطة 24 قراط، تدخل على بروفايلها تلاقيها مشيرة صور عياط وبكاء وعويل ويوميات زوجة منحوسة، وشكوى من الفقر والقهر ومر الدنيا".
وتابعت: "يبقى مترقى الصبح وابنه طالع الأول على فصله بعد الظهر وبالليل معزوم على العشاء فى "أوتيل" خمس نجوم، وتلاقيه كاتب "ستاتيس" على الـ"واتس آب" حسبى الله ونعم الوكيل فى اللى خربشلى مراية العربية.. يا مفترى، ده حتى الأفلام والمسرحيات اللى بتستهدف الكوميديا من آجل الكوميديا اللى هى علشان الناس تفرفش، تلاقى ألف من يهاجمها ويوصفها بالابتزال وقلة الأدب وانعدام المضمون والهدف، زى ما يكون الضحك والانبساط فى حد ذاته مش هدف ولا مضمون لأ لازم الجرعة تبقى نكد، نكد حلو كدة وعصر فدادين من البصل الصعيدى على القلب".
أكدت: "يا ساتر هل ده إيمان راسخ وعميق بأهمية الاحتفاظ بكثافة محددة للنكد كاتمة على عصفورة قلبنا ولا هو شكل من أشكال خزو العين و"ندارى على شمعتنا" و"عدوك ابن كارك" و"الشاطرة تقضى حاجتها والهبلة تنده جارتها" وأى هرى تراثى من النوع دة".
وأشارت إسعاد إلى: "خوفنا وهلعنا من فكرة المرح وأوعى تفرح أوى لتصيبك كوارث كونية"، هل هيودينا لشكل من أشكال الـ"كلاونو فوبيا"، بس أعمق شوية، وممكن يتطور ويخلق "killers" يمشوا يدبحوا فى مخاليق ربنا بالليل فى الشوارع من جرعة النكد المضاعفة اللى غاويين نعيش فيها دى؟ مش عارفة ربنا يستر".
