مؤمن المحمدى
أذكر مرة فى حوار تلفزيونى معاه المذيعة كانت بـ تسأله عن أجمل صوت تعامل معاه بليغ فى مسيرته كـ ملحن، فـ هو رد وردة، الحوار ده كان متأخر فى أوائل التسعينات، قبل وفاته بـ شوية.
ساعتها المذيعة استغربت من الإجابة، على أساس إن بليغ اشتغل مع أم كلثوم، وما عملش معاها لحن ولا اتنين، دول 11 لحن، فـ هو قال إجابة عبقرية: الفرق بين أم كلثوم ووردة بـ النسبة له، زى الفرق بين ملكة الجمال والست اللى بـ يحبها، وهو كان بـ يحبها بـ كل ما فيه.
يمكن علشان كده لما حصلت له الحادثة الشهيرة، وردة عملت اعتصام احتجاجا على الحكم بـ حبسه، ولما اتوفى سنة 1993، انتقلت لـ المستشفى مع إنها كانت متجوزة وقتها، هى كمان كانت بـ تحبه بـ كل ما فيها.
لكن يفضل أهم ملامح الحب ده يوم عيد ميلاد بليغ من كل سنة، خصوصا بعد انفصالهم، كانت وردة لازم تتصل بـ بليغ، سواء هو هنا أو بره مصر، وسواء هى هنا أو بره، وتستمر بينهم المكالمة لـ فترة طويلة، ولازم تغنى له: سنة حلوة يا جميل فى التليفون.
فى سنة، النص التانى من التمانينات، جه عيد ميلاد بليغ، ووردة ما اتصلتش بيه، نسيت أو ما حبتش، أو شافت إن المكالمة ما عادش ليها لازمة، وده سبب لـ بليغ وجع وأحزان وإحساس ما عرفش يتغلب عليه.
ما عرفش يتغلب عليه إلا لما قعد يكتب شعر، فـ كتب:
بـ أودعك
وبـ أودع الدنيا معك
جرحتنى قتلتنى
غفرت لك قسوتك
بـ أودعك من غير سلام
ولا ملام ولا كلمة منى تجرحك
أنا.. أنا.. أنا أجرحك
بسم الآلام
ارحل قوام
حبى الكبير هـ يحرسك
فى سكتك
بـ أودعك بصمت مُر
أنا طيف ومَر
عطشان سقيته محبتك
ما أكرهك
بودعك أنا اسمى صبر
أنا رهن أمر
أنا حب سهران يحرسك بسكتك
تصدق بـ الله
قول:
لا إله إلا الله
اليوم ده بـ كل أسى يناجيك وبـ اتمناه
يرضيك كده منك لله
تصدق بـ الله
الجرح إلى هـ أعيش وياه
بعد فراقك صعب أنساه
والأصعب إنى ألاقى دواه
ويفضل كده ما بين التقطيم والعتاب والمحبة لـ حد ما يقول:
كتبتلك زى الليلة دى
فى يوم ميلادى
غنوة لك تفكرك بموعدك
أسمعك غنوتك
سنة حلوة يا سعيد
إلى آخر الغنوة اللى محتاجة تتسمع
لما محسن جابر سمع الكلام ده، وسمعه متلحن فى غنوة، أصر إن وردة هى اللى تغنيه، وفعلا عرف يقنعها مع إن ده كان صعب عليه، وكانت أول مرة تغنى الغنوة دى مش فى شريط كاسيت، وإنما فى حفلة، والحفلة مذاعة على الهوا.
كان الاتفاق بين جابر ووردة إنها تفاجئ بليغ حمدى وهى بـ تغنى الغنوة، بـ إنها لما توصل عند الحتة اللى بـ يقول فيها:
سنة حلوة يا سعيد
تغنيها هى:
سنة حلوة يا بليغ
خصوصا إن لحن الجملة يشبه اللحن الأصلى لـ هابى بيرث داى تو يو، وفعلا وردة وقفت على المسرح، وهى مستعدة تعمل كده، بس مش عارف، ولا محسن عارف ليه غيرت رأيها فى آخر لحظة، وغنتها زى ما كتبها بليغ، بس على ما أعتقد والله أعلم إنه هو سمعها رغم إن هى ما قلتهاش.
