ولد وبنت سمرا

المسرحية كانت بطولة نصرى شمس الدين وأنطوان كرباج مع الست فيروز نفسها، وكـ العادة بـ تقدم صورة ساخرة لـ علاقة الحكام بـ المحكومين، وتنتقد الأنظمة العربية، وإلخ إلخ.

بعدها بـ سنين، انفصل الرحابنة عن فيروز، فـ قرروا يكملوا مشوارهم من غيرها، وفكروا يعيدوا مسرحيات قامت بـ بطولتها مع أبطال تانيين، واختاروا مسرحية "الشخص" علشان تكون الأولى "وكانت الأخيرة الحقيقة" فـ عملوها بـ مطربة تانية لبنانية اسمها رونزا.

فشلت المسرحية مع البطلة الجديدة، ما هو مش أى قط يتقال له يا مشمش برضه، وصعب حد يتخيل عمل قدمته فيروز مع حد تانى، مع كامل الاحترام لـ الجميع، ورغم فشل العرض، الرحبانية قرروا يستمروا فى التجربة، بس هـ يعملوا تعديلات.

قرر الرحابنة إنهم يعملوا نسخة تانية من المسرحية، وطبيعى إن النسخة دى تبقى بـ لهجة تانية، وطبيعى اللهجة دى تبقى المصرية، حلو، نجيب مين يلعب دور فيروز؟

أكيد، مفيش غيرها، عفاف راضى، فيه أسباب كتيرة تخلى عفاف هى الترشيح الأبرز، منها إن عفاف لما ظهرت، كان فيه كتير عندهم أمل إن عفاف تبقى فيروز مصر، ويقال إن من الناس اللى كان عندها الأمل ده عبد الناصر شخصيا. مش بس كده، ده كمان الرحبانية من قبل ظهور عفاف مع بليغ وهم كانوا عايزينها تشتغل معاهم، يبقى عفاف وع البركة.

الشهادة لله، أنا ما أعرفش إيه اللى جاب القلعة جنب البحر؟ يعنى ليه الرحبانية لما ييجوا يشتغلوا فى مصر، يبقى "أمل دنقل" هو الشاعر اللى يتولى تمصير المسرحية؟ "أمل" شاعر عظيم، ده رأى ناس كتير، وانا متفق معاهم، بس هو مالوش أى تجارب فى كتابة الأغنية، حتى شعره ما ينفعش يتلحن، ولـ حد دلوقتى، كل المحاولات اللى اتعملت لـ تلحين "الكعكة الحجرية" أو "لا تصالح" ماهيش تجارب ناجحة، فـ ليه "أمل"؟ وازاى اتلموا على بعض، ما عرفتش.

اتقدمت المسرحية فى مصر سنة 1982، وحظها مكنش أحسن من حظ نسخة المسرحية اللبنانية اللى قدمتها رونزا، والمسرحية ما عملتش جمهور، وحتى نسختها المصورة ما لقيتش حد يذيعها، رغم محاولات عفاف راضى المستميتة إنها تتعرض فى التلفزيون المصرى، واستعدادها التام لـ خضوع المسرحية التام تحت أى رقابة صارمة، بس محدش أذاعها، هـ تلاقيها بس ع اليوتيوب.

فى كواليس المسرحية اتقابل "أمل" و"عفاف"، واتفقوا على إنه يكتب لها أغنيات، وكتب لها فعلا 3 أغانى، اختارت منهم واحدة هى أغنية "ولد وبنت سمرا"، وجابوا ملحن شاب وقتها يلحنها هو عماد الشارونى.

الشارونى مش ملحن بـ الأساس، هو أكتر موزع، وأغلب ظهوره فى سوق الكاسيت كان كـ موزع خصوصا مع منير وعلي الحجار ومدحت صالح، ومن أشهر الحاجات اللى عملها "بره الشبابيك" و"كوكب تانى". ده قبل ما يهاجر من مصر فى التسعينات لـ أستراليا، لـ أسباب شخصية، ثم يرجع مؤخرا ويبتدى يشتغل هنا تانى فى الأوبرا وما أشبه.

اتعملت الغنوة، واتقدمت، بس برضه ما حققتش أى نجاح، وتقديرى إن تجربة "أمل" مع الغنا مكنش ليها لازمة، يعنى ممكن تسمع الغنوة، فـ يعجبك تعبير هنا، صورة هناك، يعنى كده، لكن الغنوة حاجة تانية يا جماعة، مش كفاية إنك تمتلك الشاعرية الفياضة علشان تعمل غنوة "حلوة".

فـ إحنا قدام غنوة مؤلفها مش مؤلف، وملحنها مش ملحن، ومطربتها حالة خاصة، تفتكر يعنى ممكن تنجح ازاى؟
على أى حال، "أمل" اتوفى بعدها، وعفاف ما غنتش الغنوتين التانيين، ودمتم.

بس خلاص..