كأس العالم

وقالت إسعاد: "هييه أخيرًا يا عيال بعد 28 سنة عجاف دخلنا كأس العالم، انزل يا بنى بالنشيد القومى للإنجازات الكروية، والله وعملوها الرجالة، انزل  يا بنى بعدالة السماء اللى نزلت على ستاد بالرمو، ولا كان برج ستاد العرب مش فاكرة، مصر مصر تحيا مصر".

وأضافت: "الأكيد أن الأحداث اللى بالجمال والعظمة دى، تخلى الكل يتحول لمشجع كورة متعصب لدرجة العياط والشحتفة والشهنفة كمان من الفرحة أو الزعل خلى بالك، حتى الغلابة اللى زى حالاتى اللى معلوماتهم واهتماماتهم الكروية متزدش على أن ملعب الكرة مستطيل وفيه جونين وعدد غير معروف بالنسبالى من اللعيبة، وغالبا غالبا هى كورة واحدة رايحة جاية".

وأوضحت: "الفرحة بتكون فرحة وطنية خالصة تمامًا لا فى وراها غرض ولا مصلحة ولا حتى بتبقى مستنى من وراها أكتر من إنك تشوف بلدك وسط بلاد العالم، موضوع معنوى بحت بيخليك تحس بالنغزة اياها دى حب الوطن وحب بلدك، اللى هو كل ما تيجى عليك الأيام وتنسى ولا تزعل يجيلك حاجة من دول تخليك تتنطط من الفرحة، بس هقولكم على حاجة يمكن لأنى أصلًا مش من المتيمين أوى بالكرة، أنا بحب أعيش الحالة دى جدًا مع كل إنجاز مش مع الكورة بس، يعنى فى نفس الشهر اللى صعدنا فيه ده وفى نفس اليوم كمان كان عندنا بطل فى الجودو واخد بطولة العالم، آه والله زى ما بقولكوا اهو، أخدها فعلًا مش مترشح ليها، رفع علم مصر وأخد ميدالية دهب فى بطولة العالم، البطل اسمه رمضان درويش".

وتابعت: "قبلها بكام يوم برضو كان فى ابن قرية السبيعة مركز البرلس كفر الشيخ، اسمه رامى السبيعى حقق المركز الأول فى بطولة كلاسيك أوروبا، فى رياضة كمال الأجسام، رامى السبيعى أو بيج رامى كان قبلها بأسبوع واحد فى أمريكا محقق المركز التانى فى بطولة استر أولومبيا اللى هى أهم بطولة لكمال الأجسام، على مستوى العالم، الله يرحمك يا عبدالحميد يا جندى، وفى بطل تانى محقق إنجاز دولى فى نفس الشهر اسمه محمد يحيى فى الهند فاز ببطولة مستر أولومبيا وحقق المركز الأول ورفع اسم مصر، وبسة الشهر مخلصش ونلاقى يا مؤمن اتنين أبطال مصريين بيحصدوا لقب بطولة أمريكا المفتوحة للأسكواش رنين الوليلى فراشة الأسكواش وعلى فرح اللى جاى بقوة لعرش اللعبة مع كل المصريين العالميين اللى سابقوه واتربعوا على عرش لعبة الأسكواش".

واستكملت: "اه عظيم جدًا إنجازنا اللى اتأخر كتير فى الكورة، آه والكورة أهم لعبة فى مصر والعالم بطبيعة الحال، بس الفرحة واجب تتوزع على الكل، وخصوصًا الناس اللى تعبت وشقيت وقدرت ترفع اسمها واسم مصر فى كل حتة راحوها، تحية لكل أبطالنا فى كل الملاعب، تحية جامدة واعتذار واجب، لو فرحتنا بالكورة نستنا نفرح بيكم الفرحة اللى تستحقوها، إحنا شايفينكم وعيوننا عليكم وفرحانين بيكم، ومتشرفين بيكم، وسعداء جدا جدا بيكم، كملوا ربنا معاكم قولوا آمين".