حسام عاشور
وقال عاشور "الناس عارفة قيمة حسام عاشور مفيش حد سمعلى حسّ طول 16 سنة فى النادي، لكن ممكن الناس تسأل أى حد لما حسام كان بيتطلب منه التجديد، كان بيجدد على بياض كل مرة إزاى ، أنا واخد 36 بطولة، ناقصلى 5 بطولات وأبقى اكتر واحد فى العالم واخد بطولات".
وتابع عاشور، خلال تصريحاته مع برنامج أوضة اللبس، المذاع على قناة النهار، : طلبت من كابتن سيد عبد الحفيظ التجديد لسنتين كابتن سيد قالى خلاص هكلم رئيس النادى محمود الخطيب بعدها على طول قالى رئيس النادى قال قول لـ عاشور اللى حسام عايزه هنعملهوله وربنا يشهد على كده، وبعدها رحت أقعد مع لجنة التخطيط فوجئت بإنهم بيقولولى المدير الفنى فايلر مش عايزك.
وواصل عاشور : جمال جبر قالى المستشار ترك هيعملك ماتش الاعتزال فبعدها كلمنى شخص من طرف المستشار ترك قالى طلباتك أوامر، بعدها اتكلمت مع المستشار، وقالى هعملك مهرجان إعتزال عالمى وهعملك ماتش اعتزال محدش عمله فى مصر ولا فى العالم.
وأضاف عاشور، مازلت قادر على العطاء، لكن البعض لا يرغب فى استمرارى مع الأهلى وأنا فعلت إعجازا بعدم التسبب فى مشكلة واحدة مع الأهلى خلال 16 عاما.
وأكد عاشور، أن الرئيس الشرفى السابق للنادى الأهلى المستشار ترك آل الشيخ يحب الأهلى أكتر بكتير من أشخاص داخل النادى نفسه، مشيرًا إلى أنه كان من المُخطط أن تُقام مباراة اعتزاله بين الأهلى وألميريا الإسبانى.
وأضح عاشور بداية أزمته مع الأهلى قائلا : اتفقت مع جمال جبر مدير إدارة الإعلام بالنادى الأهلى إنى هنزل فيديو أعلن فيه اعتزالى وأشكر كل الناس بعدين قعدت أعمل كل شوية فيديو وأبعته للنادى يقولولى لا فيه مشكلة هنا، واعدّل عليه كل شوية، بعد ما جبت آخرى قلت لأستاذ جمال ابعتلى سكريبت وأنا هقول كل اللى أنت عايزه، وبرضه حصل اللى حصل.
