هانى لبيب
بدأ الكاتب هانى لبيب باستعراض بعض كلمات الدكتورة نوال السعداوى من كتاب "تاء التأنيث"، قائلاً: "اللغة مؤنثة، الوزارة مؤنثة، العدالة مؤنثة، الوطنية مؤنثة، حتى العدالة مؤنثة، إزاى كل المناصب دى مؤنثة وتقبل أن يتعين فيها ذكور".
وقال لبيب فى حلقة جديدة من برنامجه "من أول السطر"، الذى يقدمه عبر "مبتدا": "الدكتورة نوال السعداوى ماتت الأسبوع اللى فات واللى حصل حواليها من اختلاف واتفاق كان أكبر بكتير من اللى حصل وهى عايشة".
وأضاف: "وقت ما كانوا بيروجوا للختان هى قالت بوضوح الختان مالوش علاقة بالدين، ووقت ما روجوا أن التحرش مرتبط بملابس المرأة، وحملوا المرأة مسؤولية التحرش نتيجة لبسها، طلعت قالت اللبس مالوش دعوة بالتحرش، اللبس ليه دعوة بالطقس بتاع المكان اللى إحنا فيه، وقت ما قالوا العنف ضد المرأة مطلوب هى رفضته، ودلوقتى بتطلع فتاوى ضد التحرش وضد العنف وضد الختان، لكن نوال السعداوى قالت الكلام ده من زمان".
وتابع: "اتهموها أنها هى اللى سوأت صورة المرأة المصرية لكن فى الحقيقة هى رصدت اللى بيحصل للمرأة المصرية بشكل حقيقى، اتهموها أنها هى اللى سوأت صورة الراجل فى مصر وأنه مستبد وديكتاتور وعنيف، لكنها فى الحقيقة ترصد اللى بيعمله الرجل، مش كل الرجالة بس ده كان الوضع العام، نوال السعداوى رصدت ده فى الكتب بتاعتها وفى رواياتها ومحاضراتها، فعلا هى تجاوزت الخطوط الحمراء لأنها صورت المرأة على اعتبار أنها ذليلة وصورت الراجل أنه هو المستبد، لكنها فى الحقيقة هى رصدت واقع كان كل الناس رافضاه، وكانت من أوائل الناس اللى تجاوزت الخطوط الحمراء، وقالت الصورة بوضوح".
وواصل حديثه: "اللطيف أن التيار المتشدد يهاجم نوال السعداوى ده طبيعى، لكن اللى مش لطيف أن بعض من المحسوبين على التيار المدنى التنويرى كانوا واخدين موقف ضد نوال السعداوى، سواء بالهجوم عليها أو بالصمت الرهيب".
وختم كلامه: "نقطة ومن أول السطر، دكتورة نوال السعداوى ماتت، وناس كتير قوى شمتت فيها، واضح أن الشماتة بقت سمة التيار المتشدد فى مصر، اللى أى حد مختلفين معاه أو مش متقبلين أفكاره أو كان بينتقدهم ويهاجم أفكارهم بيشمتوا فيه، وكأن الموت ولا ليه احترامه ولا الهيبة اللى هى كانت أحد سمات الثقافة المصرية، فى كل الأحوال فكرة أنها ماتت والله يرحمها.. لها ما لها وعليها ما عليها، ده كلام مايلزمنيش، دكتورة نوال السعداوى إذا كانت ماتت كشخصية لكن أفكارها هاتفضل خالدة، غصب عن أى متطرف أو متشدد".
