إسعاد يونس
وقالت إسعاد: "الأيام اللى فاتت عيشنا مع العالم كله كم رهيب من أحداث مأساوية، الطبيعة لما بتزعل بيبقى زعلها وحش أوى الصراحة، لا وحش أوى، كم الفيديوهات اللى شوفناها حوالينا مجموع الأعاصير اللى اجتاحت مناطق كتير من العالم، وده فى الفترة اللى فاتت دى، وأغلبها كان أعاصير من أصعب الأنواع، الحاجات دى اللى بتتصنف كوارث يعنى من أقصى درجة، الناس بالبيوت بالعربيات بالطيارات كمان كانت بطير قصاد عنينا زى قشر اللب، وإحنا بتفرج مرعوبين فى جلدنا، فما بالك بقى اللى عايشين المأساة بنفسهم، حاجة ربنا يحفظ الجميع من شرها وشرورها".
وأضافت: "بس وسط الوجع ده دايما، بتلاقى حاجات طيبة كدة وبنت حلال بجد، ممكن تلاقى حبة تصرفات إنسانية جميلة بين البشر وبعضهم، صاحب محل عفش ومراتب يفتح مراكزه لإيواء المتضررين من الإعصار بالمجان، سوبر ماركت يعرض الأكل والشرب مجانًا لأى متضرر وبأى كمية، أصحاب البيوت حتى اللى متضررتش استقبلوا المتضررين لحد ما ربنا يفرجها".
وأوضحت: "فى واحد كان ماشى بعربيته الخاصة وبيلم الكلاب اللى تاهت من أصحابها فى الإعصار، وجمعهم فى بيته وأكلهم وشربهم لحد أصحابهم ما يرجعوا، زى ما بقولكوا كدة الكل نسى الخلافات، محدش فكر ده جامع ولا كنيسة، محدش فكر صاحب المحل ده بوذى ولا هندوسى ولا أبيض ولا أسود مكنش فى غير الرحمة والتسامح، هما دول كانوا عنوان كل حاجة بتحصل على أرض الكارثة اللى اتحولت لأرض للرحمة والتسامح، دايمًا فى الأزمات بيظهر المعنيين دول وبقوة وبيبقوا عنوان كل حاجة بتحصل على الأرض".
واستكملت: "كام مرة فى أزمات الإرهاب وكوارث السيول والزلازل لاقينا قيمة الرحمة والتسامح، هى السائدة بينا وفى شوارعنا، وفى مجتمعنا كله، عد وأنسى، ومش هتفتكر كل المرات، معدن البشر الحقيقى دايما بيظهر فى المواقف الصعبة، قيم النبل والتراحم والرحمة والتسامح والغفران ونسيان الكبيرة والصغيرة، دايما حاضر فى الأزمات".
وأضافت: "مصر الخير والبنك الأهلى ومن خلال تبنيهم لحملة "تزينوا بالأخلاق" اللى هدف من أهدافها إعلاء قيمة الرحمة والتسامح للمصريين مش بس للأزمات والكوارث والمصايب فى حياتنا اليومية يا أخى، نرحم ونتراحم، لأننا بشر، ننسى ونسامح لأننا بنى آدمين، نرحم ونتسامح لأننا مصريين، كلنا مصريين مهما اختلافنا، ومهما كان بينا مشاكل وأزمات، بنلاقى اللى يفرحنا واحد، واللى بيبكينا واحد، كل واحد يبتدى بنفسه، يفكر كدة شايل من مين وزعلان من مين، ومن غير سبب ولا مقدمات يقرر يسامحه مش لأى سبب تانى".
وتابعت: "طب جرب معايا أول طفل تشوفه طبطب عليه، أول مسن تقابله بوس ايده وقوله نفسك فى إيه اعملهولك، أول واحد تشوفه فى الشارع ابتسم فى وشه، كلها حاجات صغير وبسيطة ومش هتكلفك لا وقت ولا مجهود مش أكتر من حبة مشاعر إيجابية تتبدلها مع أهلك وناسك وجيرانك واللى حواليك، حبة رحمة وتفائل، ويخالوا أيامنا أحلى ويخلونا نقدر نعيش من تعب الأيام بحبة إيمان أننا عايشين فى مجتمع بيحب ويرحم ويتسامح".
