إسعاد يونس
وقالت إسعاد: "الحقيقة وباختصار هما مش عزموا القطر، ده الشراقوة قدموا أحسن فطار، العمدة والأهالى قدمولهم كل غالى فى البلد، صبحت حكاية من حكايات الليالى، احكى يا سطور الغناوى على الرجولة والشهامة والأصول والجدعنة، باختصار هما مش عزموا القطر، ده كان وصف الشاعر الكبير إبراهيم خليل، لكرم أهل الشرقية فى حادثة عزومة القطر الشهيرة".
وأضافت: "هو إيه اللى حصل صحيح عشان نقول الشراقوة عزموا القطر، سنة 1917 وبالتحديد فى شهر رمضان، كان مرور أول قطار من أمام قرية أكياد مركز فؤوس بمحافظة الشرقية، الحكاية دى خلت أهالى القرية يصدروا فرمان شديد اللهجة وهو ش ك ع، أى شرقاوى كريم عظيم، وهو شعار الشراقوة، ويتم تنفيذ هذا الشعار بالقوة الجبرية، وهو تجهيز موائد إفطار رمضان على رصيف القطار، وإجبار جميع الركاب بالنزول لتناول الإفطار، وينزلوا الناس غصبانية كدة يفطروا مع الشراقوة، ويفضل كرم الشراقوة هو وعطائهم مضرب أمثال لحد النهاردة، هل لأن الشرقية كانت أول محطة لدخول العرب لمصر وأن أهلها بمخالطتهم لأهل شبه الجزيرة العرب الوافدين المعروفين بالكرم الحاتمى خلاهم اكتسبوا طبع الكرم اللى ملوش حدود ده، عشان الأكيد مش بس الشراقوة لا المصريين عمومًا أهل كرم وعطاء صفة من الصفات القليلة اللى متأثرتش فينا ببلاوى الزمن، وكم الكرب اللى عدى علينا، ومهما كانت الدنيا ضيقة ومهما كانت العيشة ناشفة، لازم ولا بد تلاقى المصرى يدى ويطلع ويكرم ضيفه ويجود باللى معاه حتى آخر مليم فى جيبه وآخر لقمة فى بيته".
وأوضحت: "مصر الخير من خلال حملتها الكبيرة مع البنك الأهلى، لإعادة القيم النبيلة لحياتنا المسماه بتزينوا بالأخلاق واخدين محور الكرم والعطاء، كاتنين من أهم محاور الأخلاق النبيلة، الحقيقة وبأننا بفضل جود وكرم وعطاء المصريين عدينا من كوارث كتير، نزل خبر صغير بس عن حاجة بنك الدم لمتبرعين ساعة زمن وتلاقى المصريين طوابير طوابير لحد ما بنوك الدم كلها تتملى وتفيض كمان، بنينا صروح علاجية وإنسانية عظيمة بكرم وعطاء المصريين، مؤسسات اجتماعية وتنموية ضخمة قايمة بشكل أساسى لا على شىء إلا كرم وعطاء المصريين".
واستكملت: "كام ألف بيت فى مصر مفتوحين على حس التبرعات وعطاء المصريين، كام مليون مريض وعاجز ومحتاج حياتهم كلها قايمة على تكافل المصريين وكرامهم، لا بجد بقى نبقى مش منصفين ابدا وجاحدين لو انكارنا كرم وعطاء أهل البلد الطيبة دى، ورحمتهم ببعض فى ناس مش ولا بد، آه طبعًا أكيد وطبيعى، إذا كفك نفسه مفيهوش صباع شبه التانى، يبقى طبع الدنيا الاختلاف، بس الشائع والعام مفطومين على الكرم والعطاء لحد ما بقى بيجرى فى دمهم".
وتابعت: "الكرم والعطاء مش دايما فى الفلوس أو عطاء مادى، المثل المصرى بيقول الغاوى ينقط بطاقيته والكريم والمعطاء يدى مجهود وتفكير وتعاطف ودعم معنوى قبل المادى كمان، النهاردة، بنشد على ايد المصريين الخضراء دى، استمروا يا أهل مصر، وملناش إلا بعض، ولا حد بيحس بوجعك إلا ابن البلد، شدوا ضهر بعض ببعض وخلينا مكملين ومتسندين على بعض، مكملين كرم وعطاء وجود وهنقدر نعدى بكرم أخلاقنا قبل كرم ايدينا، وعطاء قلوبنا قبل عطاء جيوبنا، والله هنقدر".
