عمرو عمار
وقال عمرو عمار فى مداخلة مع الدكتورة نائلة عمارة، فى برنامجها "ماذا ولماذا"، المذاع عبر راديو 9090: "لقيت هناك دعوات من قبل التنظيم الدولى الإرهابى للإخوان من حوالى شهرين وخصوصا على قنواتهم الفضائية بيطلبوا من المصريين بمقاطعة الانتخابات، علشان عايزين يسلبوا الشرعية من الدولة المصرية، وبعدها يبدأوا الخطط الممنهجة لهذا التنظيم الإرهابى، والذى له اتصالات ببعض المنظمات الدولية والقنوات ووسائل الإعلام الأجنبية والتى تتلقى معظمها تمويلات قطرية".
وتابع كلامه: "أنا مستهدفتش من البوست الناس المتعاطفين مع الإخوان لكن كنت بخاطب اللى كان مؤيد للسيسى منذ 2013، وتبدلت آرائه وأصبح معارض للسيد الرئيس، وأنا كنت باستهدف هذه الشريحة وهم شرفاء ومصريين ولا يجب أن ننزع عنهم صفة الوطنية".
وأضاف: "بالتالى إحنا محتاجين التعامل مع هؤلاء بشكل أكثر لطفا، ولازم نتكلم معهم بالعقل، ولكن باقوله هل إنت تفتكر بقعدتك فى البيت قدرت توصل صوتك للرئيس، لأ طبعا، إنت منزلتش الانتخابات وكسلت، وفرطت فى صوتك اللى هو غالى عليك، علشان كده أنا قلت أنزل وشارك وماتبقاش أقل وطنية وقيمة من الجندى الشهيد وأنزل شارك علشان تستر عرض مصر".
وطلبت نائلة من عمار شرح جملة "أنزل شارك علشان تستر عرض مصر"، فقال: "التنظيم الإرهابى بينهش فى عرض مصر، وأساليبهم باتت معروفة للمصريين، وبالتالى هاتبقى فرصة لهذا التنظيم لما يلاقى مفيش مشاركة فى الانتخابات وهايطلعوا على قنواتهم الفضائية، علشان كده باقول أنزل شارك ومجرد المشاركة أنا فى تقديرى هاتمنع هذا التنظيم الإرهابى فى النهش فى عرض الدولة المصرية".
