النائب محمد الحسينى
وقال الحسينى خلال اجتماع لجنة الإدارة المحلية بمجلس النواب، برئاسته، لمناقشة مشروع موازنة محافظة الجيزة وخطة التنمية الاقتصادية والاجتماعية للعام المالى 2018/2019: "عايزين نعرف مدينة الجيزة إيه المشروعات اللى عملتها، ومديرية الطرق الفاشلة فى 27 محافظة اللى محدش يعرف عنها حاجة ميزانيتها إيه، ومديرية الطرق فى الجيزة مشروعاتها إيه".
وأضاف: "مشاكل الكهرباء والصرف والمياه والطرق وغيرها، كلها بتروح للنائب، ولازم الأجهزة التنفيذية تشتغل وتتفاعل مع مشاكل الناس، وترسل خطابات لمجلس النواب عن إجراءات حل هذه المشاكل، لازم نفلتر ونراقب صح، لإن بالشكل دا مفيش مراقبة، هنراقب ناس مش عارفة حاجة ولا أى أرقام".
وانتقد وكيل لجنة الإدارة المحلية، زيادة بند تعويضات العاملين فى الجهود غير العادية بموازنة محافظة الجيزة بمبلغ مليون جنيه عن السنة الماضية، قائلا: "تعويضات العاملين فى بند الجهود غير العادية زادت مليون جنيه، طيب أنت عندك جهود أصلا، إزاى تزود مليون جنيه من قوت الشعب، وإيه هى الجهود غير العادية، ايه بيطلع يشتغل فى الشمس يعنى، عايزين نمنع الأرقام الوهمية دى، وبقول للناس اعرفوا إن المسئول اللى جزمته متلمعة متاخدش منه رجا، احنا هحاسبك على أداء وبرامج، بعض المسئولين مش بيعملوا حاجة، وديتونا فى ستين داهية والمواطن مش لاقى حاجة، رئيس الجمهورية شغال نتعلم منه، ونخلى القوات المسلحة تشرف هى على المشروعات، إحنا بنتكلم فى مصير شعب، فيه 8 ملايين مواطن فى الجيزة، وعايزين نساعد المحافظ والأجهزة التنفيذية يشتغلوا، فيه ناس بتشتغل بجد وفيه ناس هتاخد كارت أحمر قريب إن شاء الله".
