البابا تواضروس
وألقى البابا عظته، والتى جاء فيها "يوم التدشين بيكون يوم كتابة شهادة الميلاد للكنيسة وفى الصلوات بنبدأ بمجموعة من الصلوات والطلبات والأواشى وشكر ربنا وبنصلى كمان فى يوم التدشين من أجل المرضى الذين لم يحضروا معنا النهاردة ومن أجل الراقدين الذين سبقونا على السماء وبنصلى كمان من أجل أى شخص عايز يعرف المسيح وبنصلى كمان من أجل الجو الهواء والأمطار والمياه وبنصلى كمان من أجل رئيس أرضنا الرئيس المدنى اللى بيحكم الأرض فى المكان اللى موجودة فيه الكنيسة".
وأضاف :"مجموعة من الأواشى بنصليها والشعب بيرد "كيرياليسون يارب أرحم" وفى الجزء الثانى المرد بيكون "أمين " يعنى بنقوله يارب المذبح ده يساعدنا فى حياتنا يكون سبب خير وسبب حكمة، والجزء الثالث اللى هنعمله الآن وهو سكب زيت الميرون ونبدأ مع الآباء الأساقفة إننا نمسح كل المذبح بزيت الميرون، وهذا تدشين المذبح وإحنا بنرد هنا المرد يتغير الأول كنا بنقول كيرياليسون ثم أمين وبعد ما نصب الزيت نقول "هلليويا" يعنى كلنا فرحانين بالمذبح الجديد فى الكنيسة".
وتابع "وإحنا بندشن المذبح بنقول اسمه يعنى مثلًا المذبح الرئيسى على اسم "العذراء مريم أم النور والقديس مارمينا العجائبى، ومن طقوس التدشين الجميلة إننا لازم نلف حول المذبح وإحنا بنمسح المذبح بزيت الميرون والمقصود إن صوت الله يصل إلى كل مكان فى العالم من خلال المذبح والذبيحة اللى على المذبح من أجل خلاص كل العالم."
