مجدى عبدالرحيم
المقال ده كتبته وأنا متكيف وعامل دماغ عالي قوى .. عارفين كلفني كام 50 جنية بالتمام والكمال علشان اسلطن نافوخى واظبته بروقان ومعلمة .
وحبشتكه وهشتكة وأنتكة .. تسألني إيه الحبشتكة والهشتكة والأنتكة؟ اقولك مش عارف سمعتها كده وأنا راكب التوك توك، بس أنا عارف نيتكم سودا وضميركم مش سليم .. مع إني سألت " سليم " واد عمى قال ماخبرش .. طبعا انتم بتقولوا دلوقتى : الواد " سوكه " شارب حاجة، ومتعاطي حاجة وضارب حاجة ... والله العظيم أبداً .. أنا معرفش أساسا الفرق بين البانجو والملوخية .. ولما سألت الواد " تامر إصلاحية "، قال : إن الاتنين لونهم أخضر .. بس واحد بيظبط المعدة والتاني بيظبط الدماغ .. واحد بيتباع بالكيلو والتانى بيتباع باللفة .. على فكرة " تامر" ده مسافر على طول .
لا مش معاه عقد عمل في السعودية .. اقصد يعنى دماغه طايرة على طول في اللاوعي .. لكن أنا عامل دماغ ومبسوط قوى من شرب الشاي بالنعناع ، وشم ريحة شيشة التفاح من قهوة " حماصة " اللي جنب البيت ومشروبي اليومي على فكره نسكافية بالحليب وساعات كتير أشربه سادة لما الجاموسة اللي عندنا في البلكونة تكون زعلانة .. وبتخبط برجليها جامد على السكان اللي تحتينا مع إننا ساكنين اساسا في الدور الأرضي .
بتقولي بعمل دماغ إزاى بالـ 50 جنية .. أقولك يا سيدى بشتري جوزين كوارع بـ70 جنية وبشتري بـ150 جنية رأس عجل علشان أعمل لحمة رأس ، وبباقى الـ50 جنية بشتري كيلو كبدة بلدي ب 70 جنية وأعيش وأتمزج .. وممكن أضرب عرقسوس أو تمر هندي يهدى المعدة .
علشان أنا عامل مقاطعة لمشروبات المعلبات العالمية ما انت عارف .. لو سمحت هات لي معاك واحدة كانز سفن اب مشبره .
كان عندي صديق بيحب يشرب بيرة وكنت احب اقعد معاه علشان بس أكل الجبنة الرومي والخيار والخص والسوداني .. اسم الله عليك اسمها "مزة"، طيب ما انت عارف أهه .. باين عليك شريب كبير قديم .. عموما أنا ماليش في المشروبات دي خالص والحمد لله .
أهم خبر سمعته النهاردة الحاج " عباس " صاحب العمارة اللي أنا ساكن فيها مات .. الله يرحمه .. والحمد لله مش هادفع الإيجار تانى خلاص .
بتقول إيه : الحاج " عباس " وحيد ومقطوع من شجرة ومالوش قرايب ؟ ابداً والله ده متجوز وعنده كمان 6 عيال كبار .. إتنين منهم في الجامعة .
بس اكيد الحاج "عباس " مالحقش يقول لهم إننا بندفع ايجار كل شهر .. ها يقول لهم إزاي .. بقولك مات قبل الشهر ما يخلص .. انت مابتفهمش .
امبارح شفت ماتش برشلونة وريال مدريد وميسي جاب 3 اجوان ورونالدو جاب جونين والمباراة انتهت بالتعادل صفر صفر .. احسن علشان الجمهور يطلع حبايب.
الصبح رحت السنترال دفعت اشتراك النت بعد ما وقفت ساعة في الطابور .. ولما رجعت البيت اكتشفت إن الواد " سيد برشامة " قطع عنى وصلة (النت)، وقعدت احلف له ميت يمين : والله " يا سيد " دفعت الاشتراك في السنترال ومعايا الفاتورة ، وهو يضحك ويقول : يا سوكه يا كداب بطل تبلبع برشام .
بتقول ايه يا صاحبي .. انت عازمني على مشروب بينعنش ويبسط .. أنا اساسا مش بشرب في شهر رمضان حاجة خالص، بتقول ايه؟ .. رمضان مشى من زمان... ما انا عارف .. انت بس اللي مخك تخين .. كنت عديها وكبر دماغك .. يعنى عديت كل اللي فات وجاي على حكاية شهر رمضان .
