محمد هشام عبيه
* أهلا
- حضرتك بترد باختصار ليه؟
*شغل
-يعنى حضرتك مشغول، فمش بترد، ولا دى هى نفسها طبيعة الشغل؟
*الاتنين
- هو حضرتك قديم هنا؟
* من قبل ما تتولد
- طب ليه الناس بتجيب سيرة حضرتك فى كل حاجة بتحصل فى البلد، رغم أنك كبير.. والكبير له هيبة؟
*هواجس
- حضرتك كشفت عليهم عند د. أحمد عكاشة؟
* أنا عارف الحقيقة كويس
- ناس كتير مفكرة أنها عارفة الحقيقة بس وقت الجد بتركب الهوا
* أنا مبركبش
- طب ليه حضرتك ما بتردش على الناس اللى بتقول عليك كلام مش حقيقى
* مين قال إنه مش حقيقى؟
- حضرتك
* مقلتش
- لأ قلت أن اللى بيقولوه هواجس.
* وهى الهواجس كلها غلط
- يعنى الكلام غلط ولا صح
* مش مهم
- حضرتك بتحب الغموض شكلك؟
* هتهزر؟
- لا يافندم العفو أنا بس بسأل
..........................................
- إحم.. طب أنا عاوز أعرف أرد على الناس إزاى، اللى بتقول عليك كلام كده وكده
* ما تردش
- إمال مين اللى يرد
* محدش
- ونسيبها كده؟
* وهى مالها كده؟
- متلخبطة شوية، واللخبطة مرمطة، زي ما حضرتك بتقرأ على عربيات الميكروباص من ورا
* اللخبطة ظروف المرحلة
- والمرحلة دى هتطول؟
* اسألها
- ماشى حاضر، بس الناس بتحب تفهم
* كل حاجة واضحة بس انت ركز
- أنا معاك والله، ثم يعنى لما يفهموا هيعملوا إيه؟، بس أهو على الأقل اللى بيفهم بيتكلم صح.
..........................................
- إحم.. بيقولوا حضرتك بتتأثر بالسوشيال ميديا.. الكلام يعنى اللى بيسخن فجأة على فيس بوك وتويتر.
*ما بسخنش.
- بس بتتأثر شوية.. صح؟
..........................................
- حاسس أن وقتى خلص
* اختصر
- هو حضرتك بترفع السماعة وبتكلم حد وتقول له قول كذا ومتقولش كده
* انت عبيط؟
- بالإيميل طيب؟
.........................................
- يعنى ممكن تمنع برنامج ولا توقف طبعة جورنال؟
* مش كل حاجة تتقال تتصدق
- أمال أصدق إيه؟
* استفت قلبك
- الغموض وحش حضرتك
* لو اتعودت عليه مش هيبقى غامض
- طب سؤال أخير.. حضرتك شايف إحنا رايحين على فين؟
* بلاش السؤال ده
- حضرتك بتقلق من إيه؟
* اللى زيى ما بيقلقكش
- بس أنا قلقان
* خليك زيى
- الناس مقامات حضرتك
...........................…............
- فيه رأى بيقول أنكم موجودين فى كل حتة.. دى حقيقة؟
* الناس بتحب المبالغات
- طب حضرتك انتم موجودين فين
* فى كل حتة
- هو المفروض الناس تخاف منكم؟
* لا
-إ مال المفروض إيه
* اعمل الصح
- اللى هو إيه حضرتك
* محدش بيسأل على الصح والغلط وهو عارفهم
- طب ساعدنى
* اللى يساعد نفسه بيجمد قلبه
- بس إحنا مش متعودين على كده
* امال اللى حصل فى 25 يناير و30 يونيو ده إيه؟
- مدد من ربنا
* خلاص اطلب المدد تانى
- طب سؤال أخير
* ما أنت سألت كام سؤال أخير
-معلش اعذرنى.. الواحد مرتبك شوية
* انجز
- الزند.. ليه؟
* ؟؟؟؟!!!!!!!
- أيوه حضرتك.. الزند ليه؟
* $@$#$#&^^&^$$#&^)*)&&&@#&%@*$&%@*%$
- أنا برضه قلت كده
