الشاعر مجدي عبد الرحيم
عيد الدراملى واخد أجازة من أسبوع علشان بيجهز نفسه ويستعد..وطبعا عيد فالق دماغى ليل ونهار اتصالات وطلبات وجلسات ومفوضات ومشاوير.
كل مايتزنق فى حاجة يتصل بالعبد لله..وأنا خلاص بقى زهقت مش عايز أشوف وشه..ربنا يعدى اليوم ده على خير ويدخل عيد الدراملى عش الزوجية وأرتاح .
المهم خلينا فى الليلة دى..علشان دى ليلة فرح وبلاش نقلبها نكد..اليوم اتصل عيد الدراملى وعايزنى أجيب له عربية رئيس مجلس الإدارة المرسيدس علشان يتزف فيها.
قلت : ياعم عيد نأجر لك عربية على حساب الزملا فى الشغل،وهو راسه وألف جزمة..ترباس ورافض أى نقاش .
عيد : أنا عايز عربية رئيس مجلس الإدارة..إنت عايزنى أطلع عيل قدام العروسة وأهلها..أنا قلت لهم هاجيب عربية الرئيس يعنى هاجيب عربية الرئيس .
المهم دخلت على الريس وقلت : ياباشا الليلة فرح عيد الدراملى والجوازة واقفة على حاجة بسيطة محتاجين كرم سعادتك،الريس : يا أبوالأمجاد اى طلبات أوفلوس تحت أمركم .
قلت: خيرك سابق ياباشا..احنا بس كنا طمعانين فى عربية سعادتك المرسيدس السودا تزف العريس، الريس : ماشى خد العربية وألف ألف مبروك.
خلصت موضوع العربية مع الريس واتفقت مع عم حسن السواق يذهب إلى محل ورد من أجل تزينها ونتقابل عند الشركة علشان نروح سوا نجيب عيد الدراملى من البيت وبعدين نذهب للكوافير فى فيصل نجيب العروسة.
بس ياحضرات رحت عند بيت عيد فى امبابة والعيال اتلمت على العربية وهات يتقطيع فى الورد والبلالين وشالوا الزينة كلها والسواق هايتجنن.
المهم نزل عيد شاف المنظر قلع الجاكتة وقعد يشتم ويزعق وأنا عمال اهدى فيه: روق ياعريس.. الليلة ليلتك ياوله أمك دعيالك .
عند الكوافير زحمة قوى اتلطعنا للساعة 8 مساء.. تأخير قهرى الكوافير مطلع النهاردة 12 عروسة ماشاء الله،عيد قال:ماناخذ أى عروسة جاهزة ونمشى.
بس طلعت العروسة من الكوافير وبدأت أول المشاكل،أخت وأم وبنت خالة العروسة عايزين يركبوا المرسيدس مع العروسة،قلت: ياجماعة ماينفعش مافيش مكان.
أم العروسة: ماينفعش ازاى..اسيب بنتى فى ليلة زى دى،قلت: ياجماعة هاركب قدام مع السواق وفى الخلف العريس والعروسة علشان ياخدوا راحتهم فى القعدة.
أم العروسة:وأنت أساسا تركب معاهم ليه حضرتك تقرب للعريس..حضرتك من أهل العروسة، أنا إنكتمت ومش عايز الجوازة تبوظ على ايدى.
قلت ( انقاذا للموقف علشان الليلة تعدى على خير): خلاص أنا مش راكب إتفضلى حضرتك إركبى مكانى ياست الكل.
أخت العروسة:وأنا كمان لازم أركب مع أختى أنت هاتمنعنا نركب معها ولا ايه ياأستاذ ..وبعدين الريس كتر خيره هو اللى باعت العربية مجاملة للعريس.
بنت خالة العروسة:وأنا كمان لازم أركب مع بنت خالتى،وأنا عمال ابص على عيد الدراملى انه يرد بكلمة واحدة على حماته وأخت العروسة وبنت خالتها أبدا عامل زى كوز الذرة الواقف فى غيط برسيم .
السواق : ياجماعة ماينفعش كده دى عربية الريس وممكن تتبهدل،أم العروسة: وأنت مالك حد طلب رأيك فى الموضوع .. أنت سواق وبس .
عم حسن السواق إتزربن ووشه أحمر ومزاجه اتعكر ولسه هايزعق فيهم رحت ساحبه على جنب وقعدت اهدى فيه علشان اليوم يعدى على خير والجوازة تمشى.
قلت : خلاص ياجماعة أم العروسة تركب قدام وأخت العروسة تركب جنب العروسة..أما إنتى ياحلوة ماينفعش تركبى مافيش مكان.
بنت خالة العروسة: مافيش مكان ليه هيه جت عليا أنا وبعدين ايه حلوة دى أنت بتعاكسنى..قال حلوة قال، قلت : ياهانم أنا مش بعاكس ولا حاجة، قالت بدلع : هانم ايه ياستاذ أنا لسه أنسة.
المهم لمحت سعيد زميلنا فى الشغل ركبت معاه ومشينا ورا العريس علشان نروح للاستديو من أجل التصوير .
سعيد : هو عيد الدراملى غاوى يشحططنا ساكن فى امبابة والكوافير فى فيصل والاستديو فى وسط البلد وقاعة الفرح فى مدينة نصر وشقة الزوجية فى 6 أكتوبر.
قلت : كل التعب ده مش مهم بس ربنا يتمم الموضوع على خير والليلة دى تعدى وعيد ياخد عروسته ويروح بيته الجديد.
عيد الدراملى رن على المحمول الووووووووو، عيد : ياعم مجدى حماتى مش عاجبها استديو وسط البلد عايزانا نطلع على استديو هيه عارفاه فى شبرا..خد كلمها يا صاحبى.
قلت : ياماما أكيد الاستديو بتاع شبرا أفضل لانه على ذوق حضرتك..بس اليوم الخميس واكيد كل الاستديوهات محجوزة وممكن نروح ونلاقيه مشغول.
أم العروسة: وايه يعنى لو مشغول ننتظر شوية هيه الدنيا طارت،قلت: والله ياماما ماطرتش بس احنا دفعنا مقدم للاستديو ولو مارحناش هايضيع علينا العربون.
أم العروسة : يضيع العربون وايه يعنى المهم بنتى تتصور فى استديو كويس..دى صورالعمر..هيه بنتى هاتتصور كل يوم ولا هاتتصور كل يوم.
خد معاك العريس صاحبك تتفاهموا ويا بعض،وراحت حادفة التليفون للعريس،عيد الدراملى: ايوه ياأبو الامجاد ايه رأيك عايزك تحل المشكلة دى.
قلت : عايز رائى بجد،عيد: أيوه يامجدى قلت : أنا رائى النهائى مافيش تصوير خالص لا فى وسط البلد ولا فى شبرا .. واللى مش عاجبه يضرب دماغه فى الحيط .
