الشاعر مجدي عبد الرحيم
المدام : ايه رأيك نروح مصيف إسبوع قبل رمضان ، قلت: لما أرجع نتكلم فى الموضوع ده .. أنا عندى شغل دلوقتى .. يامدام إرحمينى .
المدام : يووه هو أنا معرفش أكلمك .. إرحمنى إنت وقول موافق علىى المصيف علشان ارتب إمورى مع ماما وإخواتى البنات نطلع كلنا مع بعض .
قلت : نطلع كلنا مع بعض .. هههههههههههه أنا مش طالع مصايف خالص ، المدام : إنت دايما تسد نفسى كده .. مافيش مرة تحاول تسعدنى . آه يابختى آه ياقسمتى آه يانصيبى .
المهم ياحضرات روحت البيت بالليل لقيت حماتى لسه عندنا والمدام ضاربه بوز طبعا علشان موضوع المصيف .. هو فيه راجل عاقل يطلع مصيف مع حماته .. وكمان اخوات مراته .
قلت : اهلا ياماما نورتى البيت .. حصلت لنا البركة ، حماتى : اهلا وسهلا ، قلت : جهزى أحلى عشا لاحلى ماما ياقلبى ، المدام : إتعيشنا كلنا ياحبيبى من ساعة.
قلت : إزيك ياروحى ، المدام : روحك هههههه .. أنا لو روحك صحيح كنت وافقت على المصيف.. مش كفاية عليا هم وتعب وخدمة طول السنه حرام اصيف إسبوع يعنى .
طبعا عملت عبيط وصدرت الطرشة وقلت : بقولك ايه ياعمرى ماتقومى تحضرى لقمة اكلها أحسن أنا جاى واقع من الجوع .. المدام : حاضر من عينى بس خليك عارفها بقى .
المدام : الا قول لى ياجوزى إنت تعرف واحدة اسمها سهام ، قلت ( فى سرى) : اللهم اجعله خير، المدام : مالك ساكت ليه .. مين سهام دى ، قلت : مش عارف تقصدى ايه بالظبط .
المدام: ايوه ياخويا إتمسكن وإعمل حركاتك دى مانا عرفاكم رجالة مالكمش امان .. سهام ياخويا لحقت تنسى سهام .. سهومه اللى شايل صورتها وارقام تليفوناتها معاك ليل نهار فى المحفظة.
قلت : ياهانم حرام عليكى المحفظة مليانه ارقام رجاله وستات عادى ده شغل ، المدام : شغل ايه واحدة تديك رقم محمولها وكمان بيتها ليه بقى ان شاء الله .
قلت : طيب ورينى الورقة بس ، المدام : ايوه ياخويا عايز تاخد دليل إدانتك وجريمتك إستحالة أديك الورقة هو أنا عبيطة ، راحت حماتى الله يسامحها داخلة فى الخط : طول عمرك مظلومة يابنتى .
قلت : والله العظيم أنا مش فاهم حاجة خالص .. إنتوا ايه عايزين جنازة وتشبعوا فيها لطم ، حماتى : إحترم نفسك وإتكلم على قدك .. عيب تقول كده، المدام : مش كفاية إنك خاين وكمان تغلط فينا .
حماتى: قومى يابنتى جهزى هدموك بيت ابوكى اولى بيكى ، المدام : حاضر ياماما الظاهر إنى إتسامحت فى حق نفسى كتير .. شغالة خدامة عندك وعند عيالك وساكتة والآخر كمان تخونى .
قلت : لومشيتى مع امك مش هاترجعى البيت ده تانى، المدام: إنت بتهددنى .. آه ماهى فرصة وجت لحد عندك علشان تتخلص منى وتفضا لحبيبتك سهام هانم .. أنا ماشية وسيبهالك مخضرة .
المهم ياحضرات إتصلت بحمايا وحكيت له الموضوع .. وقال لى إنه جاى حالا ، حماتى : تتصل ماتتصلش خلاص بنتى مش قاعدة لك فى البيت، المدام : ايوه مش قاعدة خلى سهام تنفعك .
حمايا وصل وقعد يتكلم مع زوجتى وحماتى ساعه مافيش فايدة ، حمايا : مش جايز يابنتى جوزك بيعمل موضوع لجريدة الحياة اللى بيكتب فيها ، حماتى: آه دافع عنه ماهو حبيبك ياراجل قول كلمة حق .
المدام : ده متلبس يابابا ومعايا جسم الجريمة صورة سهومه وارقام تليفوناتها .. مش ناقص بس غير إن البيه جوزى يعترف ، حماتى: تلاقيك زيه خاين وبصباص وأنا نايمة على ودانى .
حمايا خد الصورة وإتصل برقم محمول سهام وأعطى التليفون للمدام تتكلم ، سهام : الوووو ايوه يافندم مين معايا ، المدام : أنا بتصل بحضرتك من جريدة الحياة .
سهام : اهلا وسهلا ياترى نشرتوا موضوع فوزى بالجائزة ، المدام : جايزة ايه ؟، سهام : أنا فزت بجائزة دولية فى البحث العلمى والجريدة مشكورة إتصلوا بيه وقالوا لى إنكم هاتكرمونى .
المدام : والله مش عارفة طيب ومين اللى إتصل بيكى من الجريدة، سهام : الاستاذ مجدى وإنا اعطيته كمان صورة شخصية ليه علشان هاينزل خبر بالموضوع فى الجرنان .
