الشاعر مجدي عبد الرحيم
حمايا خد الصورة وإتصل برقم محمول سهام وأعطى التليفون للمدام تتكلم ، سهام : الوووو ايوه يافندم مين معايا ، المدام : أنا بتصل بحضرتك من جريدة الحياة .
سهام : أهلا وسهلا ياترى نشرتوا موضوع فوزى بالجائزة ، المدام : جايزة ايه ؟، سهام : أنا فزت بجائزة دولية فى البحث العلمى والجريدة مشكورة إتصلوا بيه وقالوا لى إنكم هاتكرمونى .
المدام : والله مش عارفة طيب ومين اللى إتصل بيكى من الجريدة، سهام : الاستاذ مجدى وإنا أعطيته كمان صورة شخصية ليه علشان هاينزل خبر بالموضوع فى الجرنان .
طبعا ياحضرات جردل مية باردة نزل على حماتى ومراتى ، حمايا : شفتى بقى يابنتى كنتى ظالمة جوزك ازاى ، المدام : يووه بقى يابابا طب ويشيل صورتها معاه ليه .. مايسبها فى الشغل .
وأنا ساكت ياحضرات مش عايز أتكلم .. وأستنى إن حماتى ولا حتى مراتى تعتذر ليه على شكها فى سلوكى أبدا ، المدام : طيب قول له يابابا رافض ليه يطلعنا مصيف أنا والعيال قبل رمضان مايدخل علينا .
حمايا: أنا ماليش دعوة بالحاجات دى ، حماتى : ماهو رافض علشان عرف إنناعايزين نطلع كلنا عيلة واحدة .. ومعانا بناتى دعاء وولاء وماجدة وأزواجهم وعيالهم .
قلت : ياجماعة إرحمونى أنا امكانياتى على قدى ولسه خارج من موسم امتحانات ورمضان والعيد على الأبواب وكل ده عايز فلوس ..أروح كمان أطلع مصيف أجيب فلوس منين يعنى أسرق .
حماتى: وتسرق ليه ياسعادة البيه ، المدام : المهم ينكد عليا ويحرمنى من المصيف .. طيب وهما أزواج اخواتى اللى طالعين المصيف كانوا يعنى بيسرقوا ولا يعنى حرامية .
قلت : بقول لك ايه خلي اليوم ده يعدى على خير .. أنا لا قلت بيسرقوا ولا حرامية .. كل واحد حر فى حياته مافيش زفت مصيف يعنى مافيش زفت مصيف ، حمايا : والله ياابنى إنت حر فى حياتك .
المدام : والله يابابا حرام كده .. هو مش من حقى أريح أعصابى من تعب ومجهود موسم دارسى كامل ..حرام عليكم ياعالم أنا شغالة خدامة طبخ وكنس ومسح وغسيل ومكوى وشراء طلبات للبيت ومذاكرة للعيال .
قلت : يامدام أنا مقدر تعبك ومجهودك بس انتى مش خدامة ده بيتك ومملكتك وأولادك .. وأنا مش مقصر معاكم وكل واحد ليه دور ماأنا بيطلع عينى فى الشغل والمواصلات والحياة .
المدام : خلاص يا جوزى بلا مصيف بلا وجع دماغ .. المصيف ده ترفيه وكلام فاضى خلينا فى المهم إيدك على 1000 جنيه ، قلت : ليه إن شاء الله هاتعملى بيهم ايه ؟ .
المدام : إنت ناسى إن رمضان على الأبواب كل سنة وإنت طيب ، قلت : لا مش ناسى ، المدام : طيب هات بقى الفلوس علشان ألحق أجيب خزين البيت قبل الأسعار ماتزيد والمواد الغذائية تختقى من السوق .
قلت : ياست إرحمينى بقى هو علشان مافيش مصيف تنتقمى منى يعنى ، المدام : سامع يابابا ..شاهدة ياماما بيقول عليا بنتقم منه ، حمايا : اهدي بس يابنتى .
المدام : علشان عايزة أجيب خزين البيت قبل رمضان .. يارب أنا خلاص تعبت من الراجل ده .. أنا هاتجنن ، قلت : والله أنا اللى إتجننت منك ومن عمايلك .
حماتى : إنت عايز ايه بالظبط مافيش مصيف ماشى .. كمان طلبات البيت مش عايز تجيبها .. والله إنت حاجة صعبة خالص .. الله يكون فى عونك يابنتى .
قلت : لوسمحتى ياحماتى ماتتدخليش فى حياتى .. بيتى وأنا حر امشيه على مزاجى وبالطريقة اللى تعجبنى ، حماتى : أنا غلطانة أساسا إنى بتدخل .. أنا ماشية ، المدام : إستنى بس ياماما أنا جاية معاكى .
حمايا : ياجماعة صلوا على النبى ماينفعش كده، قلت : عليه الصلاة والسلام .. حاضر ياعمى ، المدام : مانتاش شايف كلامه يابابا، حماتى : أنا ماشية أحسن يفتكرنى عايزه أخرب البيت.
المدام : خلاص يابابا تحت أمرك ، حمايا : طيب نقرأ الفاتحة وصافى يالبن ، قلت : حليب ياقشطة ، المدام : بس يجيب ال 1000 جنيه علشان اشترى طلبات رمضان .
