الشاعر مجدي عبد الرحيم
المدام خلصت الرغى وعدلت وشها فى اتجاهى زى مدفع الهاون وقالت: كل سنة وأنت طيب بكره أول يوم رمضان وأنا عزمت بابا وماما واخواتى على الفطار.
قلت : يامدام أول يوم رمضان الناس بتفطر فى بيوتها ده عرف معمول بيه من زمان، المدام: بلا عرف بلا تقاليد يعنى ايه عاوز تكسفنى مع أهلى بعد ماعزمتهم.
قلت: إزاى وأنا برضه أقدر أكسفك،المدام: عايزهم يقولوا عليا ماليش كلمة فى البيت، وبعدين ياحبيبى عاوزة أقول لك حاجة مهمة قوى،قلت: خير إن شاء الله.
المدام : لازم تعرف إن بابا ربنا يخلى حسه فى الدنيا جاله من البلد ديك رومى كبيرجداً وكتر ألف خيره طلب منى أعمله بكره على الفطار، قلت: ياسلام .
المدام : يعنى بالعربى أنت مش هاتغرم حاجة فى العزومة، قلت: يامدام مش قصدى، راحت قاطعة كلامى وقالت: خلينا فى المهم أول حاجة إنزل دلوقتى هات الديك من عند بابا.
قلت: يامدام الساعة 10 مساء طب ماتخلى المحروس أخوكى يجيبه فى التاكسى بتاعه، المدام : والله فكرة هايلة ياجوزى أنت عليك أفكار جميلة .
اتصلت بالمحروس أخوها من المحمول بتاعى وهات يارغى..وأنا أعصابى عماله تتحرق، وفى الآخر قالت: أخويا عنده شغل روح هات الديك ماتضيعش وقت.
نزلت من البيت فى إمبابة لشقة حماتى فى العباسية والدنيا زحمة قوى وحماتى فرصة وجت لحد عندها زى الجزار اللى استلم الدبيحه وهات يانصايح وتعليمات.
حماتى: خلى بالك من الديك..على مهلك عليه شويه.. ده ديك متربى على الغالى..شايف الديك كبير ومربرب ازاى..امسكه بشويش.
حاسب كده ممكن يتخنق أنت اول مرة تشوف ديك رومى.. يعنى هاتكون شفته فين، المهم كان ناقص ياحضرات أكتب لحماتى محضر استلام للديك وتعهد بالمحافظة على حياته.
كل اللى فات كوم واللى عمله الديك فى الطريق كوم تانى.. ركبنا ميكروباص وأنا عمال أحايل فيه مايعملش صوت أحسن السواق يزعل لكن الديك راسه ناشفة زى المدام..رفض يسكت.
وفجأة على كوبرى 6 أكتوبر نط الديك من الشباك وهات ياجرى وأنا عمال أصرخ : حاسب ياأسطى والديك يجرى.. وأنا أجرى وراه زى المجنون.
والناس عمالة تضحك .. افتكرونا بنصور فيلم على الكوبرى.. قال فيلم قال .. دى خلق تطلع فى السينما.. المهم مسكته بعد ماقطع أنفاسى وهدومى.
رجعت البيت الساعة الواحدة صباحا عاوز أرتاح شوية، المدام : أكيد الديك جعان وعطشان، قلت: ده أنا اللى عطشان وجعان، المدام : الديك هاينام فين.
قلت: مطرح مايعجبه، المدام: أنت بتهزر.. بذمتك مش شكله حلو.. إيدك على 300 جنيه، قلت: ليه إن شاء الله، المدام : أنا عاملة عزومة تشرفك قدام أهلى.
وبعدين لسه فيه حاجات لازم تتعمل جنب الديك .. دى عزومة كبيرة والعدد كتير ماشاء الله ياجوزى..لازم أجيب لحمة وفراخ وأعمل صينيتين بطاطس.
وصينيتين مكرونة بشامل وملوخية خضراء وبامية وكوسة وشوربة خضار.. إلخ، أنا رحت قاطع الشريط اللى راح اسمعه، وقلت: بس خلاص خدى الفلوس واطلعى من نافوخى حرام عليكى.
المدام : أنت دايما تفسد الجو الجميل اللى معيشاك فيه وكمان لازم تكسر قلبى آه يابختى..آه قسمتى..آه يانصيبى..مش كفاية ياراجل هاتفطرعلى ديك رومى.
أنت كنت تحلم حتى تتصور معاه .. جوزى ممكن تاخد بكره اجازه علشان تساعدنى،قلت: مش ممكن وبعدين أنا مابفهمش فى الديوك الرومى زى حماتى ماقالت أنا عايز انام شوية.
المدام : الساعة إتنين صباحا مش راح تتسحر، قلت: أنام شوية وصحينى أتسحر وأصلى الفجر..ولسه يادوب هانام، المدام: جوزى جوزى فيه مشكلة .
قلت: خير، المدام: الديك الرومى،قلت: ماله، المدام: أنت هاتخش لي قافيه مش عارفة هايتحمر ازاى وفرن البوتاجاز بتاعنا صغير.
وطبعا حضرتك مش راضى تشترى بوتاجاز جديد كبير، قلت: أروح اشترى واحد دلوقتى، المدام : الساعة إتنين ونصف صباحا والمحلات مقفولة .
قلت : الصباح رباح ياعالم عايز أنام عندى بكرة زفت شغل، المدام: تنام ازاى مش تشوف حل معايا فى المشكلة دى ولا أنت عايز تاكل على الجاهز وخلاص.
شوية ياحضرات والمدام صرخت زى أرشميدس: وجدتها وجدتها!!!! ...... للموضوع بقية المقال القادم .
