الشاعر مجدي عبد الرحيم
المدام:ماما اتصلت دلوقتى على المحمول..وبتسأل احنا هانعمل كحك وبسكويت قد ايه ومحتاجين كام كيلو دقيق علشان تعمل حسابنا أصلها هاتشترى شوال كبير.
قلت: يامدام إرحمينى وحسى بيه،المدام:كنت حسيت إنت بيه وفرحتنى وشوفت طلباتى،قلت : يعنى عايزة ايه ، المدام : نجيب كام كيلو دقيق للكحك والبسكويت.
قلت:ولا كيلو مش هانعمل كحك خالص،المدام:ليه بقى ان شاء الله،قلت:هو أنا معايا فلوس نجيب هدوم للعيال..لما نروح نجيب دقيق للكحك والبسكويت.
المدام:شوفوا الراجل المفترى رفض يجيب هدوم للعيال فى العيد..وكمان رافض نعمل كحك وبسكويت .. بذمتكم ينفع عيد بدون كحك وبسكويت.
قلت:الله يكرمك سيبينى أتخمد عايزأنام..من أول يوم رمضان ويوم ليلة الديك الرومى أنامستوى،المدام : تنام ازاى يا أخويا مش لما تحل مشكلة الكحك الأول.
المهم ياحضرات فى يوم راجع من الشغل مدغدغ من الحر والصيام والتعب..قلت لنفسى احذ حمام بارد وأتوضى واصلى العصر وانام واصحى على المغرب.
وطالع على السلم لقيت الانترية وترابيزة السفرة والكراسى محطوطين على باب الشقة..أنا إتخضيت إفتكرت إننا معزلين من امبابة وخدنا شقة جديدة فى مدينة 6 اكتوبر.
طيب ناخد شقة ازاى من ورايا ومن غيرعلمى..هو أنا بخرف من الصيام ولا ايه..دخلت من باب الشقة بشويش لقيت حماتى والمدام واخواتها قاعدين يعملوا كحك وبسكويت.
وحاطين طشت كبير مليان عجين وحواليه شوية صاجات من بتوع الفرن..والعيال الصغيرة عاملين دوشة وهيصة والكل شغال فى عمل الكحك.
المدام:حمد الله على السلامة ياحبيبى،قلت:الله يسلمك ايه ده ياهانم،المدام:ده فضلت خيرك كحك العيد وبسكويت العيد،قلت:ماأنا عارف إنتى بتكسرى كلامى.
المدام:تعالا بس جوه أفهمك ياروحى،بس ياحضرات دخلنا غرفة نومى والشرار طالع من عينى وخلاص هانفجر فيها،قلت:ايه ده ياهانم بتتصرفى من دماغك.
المدام:هو أنا أقدر ياحبيبى..الحكاية إن ماما واخواتى ماهنش عليهم إننا مانعملش كحك وإتفقوا ييجوا يعملوه عندنا علشان يشاركونا فرحة العيد.
قلت: آه يفرحونا ويبهدلوا لنا الشقة بالمرة ويعطونا زكاة العيد كحك وبسكويت،المدام: إنت ليه بتقول كده..الناس جايين يفرحونا ويسعدونا كتر خيرهم بقى.
قلت:أنا لاعايز كحك ولا بسكويت..ولاعايزهم يسعدونا خالص،المدام : علشان خاطرى ماتحرجنيش معاهم يقولواعليا ايه ماليش كلمة فى البيت.
قلت : طيب عن اذنك أنا ماشى،المدام:رايح فين ياحبيبى، قلت:رايح انام فى الجامع وبالمرة هافطر على مائدة الرحمن اللى على ناصية الشارع.
المدام : ياحياتى تعالا بس الناس يقولوا علينا ايه ازاى تفطر فى الشارع،قلت:هايقولوا إنك مطلعة عينى ومطفشانى من البيت..ومابتسمعيش كلامى خالص.
المدام: جوزى جوزى،قلت:فيه ايه تانى،المدام:طيب ايه رأيك اعمل شوية بيتى فور وغريبة كمان بالمرة..ده العيال بيحبوهم قوى.
قلت: ارحمينى وبعدين جبتى الفلوس منين،المدام: ماما ربنا يكرمها سلفتنى ونبقى نسدد لها بعدين، قلت : وإن شاء الله سلفتك كام،المدام : 3000 جنيه ياحبيبى.
قلت: ليه إن شاء الله..هاتعملى كحك ب3000 جنيه،المدام:ليه ياحبيبى هو أنا مجنونة شوف ياسيدى 500جنيه للكحك والباقى هاجيب بيهم هدوم العيد للعيال.
قلت : وأنا هاسدد ازاى الفلوس دى..مرتبى يادوب ممشينا وعلينا اقساط كتير..قسط اللاب توب بتاعك وقسط دخول المدارس وقسط شاشة التليفزيون اللى دبستينى فيها.
المدام: خلاص خلاص إنت كل شوية تقعد تفكرنى بحكاية الاقساط..وتسمم بدنى وتسد نفسى عن الدنيا آه يابختى..آه ياقسمتى..آه يانصيبى.
قلت: ربنا يسعدهم ويفرحهم كمان وكمان .. وربنا يريحك منى عن اذنك أنا رايح الجامع وهاعتكف هناك العشر الاواخر من رمضان وأريحك من خلقتى.
المدام : شوفوا الراجل ماستحملش كلمتين منى فى الحق .. وماصدق هرب من البيت .. طيب هاتروح منى فين أنا قاعدة على قلبك للنهاية.
