الشاعر مجدي عبد الرحيم
قلت:استر يارب خير ياهانم،المدام : إحنا خلاص عملنا الكحك والبسكويت والغريبة والبيتى فور،قلت:ألف مبروك ياستى سيبينى بقى أنام حرام عليكى.
المدام: تنام ايه ياحبيبى عايزين نودى صاجات الكحك الفرن علشان تستوى ومافيش غير حسين ابنك والكحك كتير ومش هايقدر يشيل لواحدة ياريت تروح معاه.
قلت:أنا اشيل كحك وبسكويت وكمان اروح الفرن واقف مع الستات إنتى إتجننتى..ولا جرى لنافوخك حاجة..أنا مستحيل أروح الفرن .
المدام : يعنى اروح أنا ياحبيبى يرضيك اشيل صاجات الكحك والبسكويت على راسى وأنزل بيها الشارع وإنت موجود..الناس تقول عليك ايه.
قلت: لا مايرضنيش طبعا خلاص خلى كل واحدة من اخواتك تبعت عيل من عيالها مع حسين..وكمان فين ازواج اخواتك هو الكحك ده مش معمول ليهم برضه.
وبعدين الناس دلوقتى بتشترى الكحك جاهز وتريح دماغها من وجع القلب ده،المدام: أنا بحب اعمل الكحك بنفسى علشان يكون مضمون وكمان بعمله بالسمن البلدى .
قلت: ماشى ياهانم ربنا يقويكى،المدام : ياراجل هو كل حاجة أطلبها منك لازم تطلع عينى وتتعبنى..إحنا دلوقتى فى إنقاذ موقف ومافيش هنا غيرك إنت وحسين.
المهم ياحضرات شلت صاجات الكحك والبسكويت مع حسين ابنى ورحنا الفرن .. وكان منظرنا يضحك .. (يضحك ايه بس ).
كان منظرنا يكسف الفرن كله ستات وبنات وعيال..الله يسامحك يامراتى تحطينى فى الوضع المحرج والمهبب ده.
وصاحب الفرن الحاج مصطفى مصدق شافنى شايل صاجات الكحك وقعد يضحك ويقول : آهلا يااستاذ مجدى وياترى إنت برضه اللى عملت الكحك على ايديك.
قلت: إحترم نفسك ياحاج الحكاية مش نقصاك..لوسمحت سوى لنا الكحك بسرعه..علشان مش معقول اقف وسط الستات كده.
الحاج مصطفى : إنت زعلت منى أنا بهزر معاك .. على العموم فيه دور ونظام قدامك 3 ساعات بالظبط وتستلم الكحك مستوى عشره على عشره .
قلت:خلاص خليك هنا ياحسين ولما الكحك يخلص إتصل بيه على المحمول..وأنا اجى لك على طول .
ورجعت الشقة ولسه هادخل انام لقيت المدام :إنت رايح تنام ، قلت: إطلعى من نافوخى عفاريت الدنيا بتتنطط فى وشى..أنا داخل أتخمد ولما حسين يتصل صحينى .
المدام : شوفوا الراجل مش طيق منى كلمة واحدة .. خلاص ياجوزى إدخل نام وإرتاح..بس ليه طلب بسيط ويارب ماتكسفنيش ياحياتى .
قلت:خير يارب، المدام :شوف ياروحى ماما واخواتى البنات طالعين مصيف رابع يوم العيد لمدة اسبوع فى الساحل الشمالى ايه رأيك نطلع معاهم ونفرح العيال.
قلت: ياهانم إرحمينى إرحمينى إرحمينى،المدام : مالك بتصرخ ليه هو أنا عملت لك حاجة هو أنا معرفش أتناقش معاك .. كل حاجة تزعق وتصرخ .
قلت:رحمتك يارب .. ياهانم إنتى عارفة البير وغطاه وكمان لسه مدبسانى فى الكحك وهدوم العيد ومش عارف اساسا هانسددهم ازاى .
وكمان ملابس ومايوهات للعيال علشان البحر كنت عملت ايه..آه يابختى..آه ياقسمتى..آه يانصيبى .
قلت:خلاص خلصتى المحاضرة بتاعتك..سيبينى انام بقى الله يكرمك،المدام : نام ياحبيبى وارتاح .
ولسه ياحضرات هاروح فى النوم إتصل حسين على المحمول:الووو الووووو ايوه يابابا الكحك والبسكويت طلع من الفرن ..تعالا دلوقتى حالا علشان تشيل معايا .
