الشاعر مجدي عبد الرحيم
قلت ( فى سرى ) : أكيد أكيد فى مصيبة مستنيانى لان الإستقبال الجميل دة أكيد وراه طلبات وحاجات ومحتاجات ، ومراتى ماكدبتش خبر وفهمت اللى بفكر فيه .
المدام : إدخل ياحبيبى غير هدومك وخدلك كمان دش بارد يرطب جسمك على بال مااحضر لك الغدا .. ده أنا عملالك جوزين حمام وشوية ملوخية يستهلوا بقك .
المهم ياحضرات خدت الحمام البارد .. وكلت كمان الحمام المحشى والملوخية واتبسطت وشبعت على الآخر .
المدام : إتفضل ياحبيى إرتاح على الكنبة وإشرب كوباية الشاى بالنعناع دى تظبط لك مزاجك فل الفل ، قلت : الله يخليكى ليه ياروحى .
المدام : إسمع ياقلبى ليه عندك طلب وحيد وحياتى عندك ماتكسفنيش .. ولو أنا غالية عليك ماتزعلنيش ، قلت : خير ياهانم اطلبى .
المدام : إنت عارف طبعا إن اخواتى البنات وماما وبابا طلعوا المصيف رابع يوم العيد للساحل الشمالى ، قلت : طبعا عارف مش أنا رفضت نطلع معاهم .
المدام : مانا عارفة ياحبيبى إنك رفضت علشان ممعناش فلوس وكتر خيرك وافقت وسمحت لى إنى اعمل كحك وبسكويت .. وكمان إشترى ملابس للعيال فى العيد .
قلت : المهم عايزة ايه دلوقتى منى ..هاتى من الآخر علشان أرتاح وأدخل انام ، المدام : ياراجل اصبر وهدى عليا شوية .. إنت مش مستحمل كلمة منى .
قلت : مانا عارف من ساعة مادخلت الشقة وإنتى بتخططى وتدبرى وتجهزى للطلب بتاعك ده ، المدام : جتك ايه ياجوزى دايما فاهمنى وحافظنى وكاسفنى .
قلت : طبعا دى عشرة عمر ياهانم .. أنا اقدر افهمك وأعرف عايزة ايه من غير ماتتكلمى خالص ، المدام : ياسلام عليك طيب أنا عايزة اطلب منك ايه دلوقتى؟ .
قلت : اكيد عايزة تقولى إن ماما وبابا واخواتك الببنات إتصلوا بيكى من المصيف فى الساحل الشمالى اكتر من مرة .
المدام : ياسلام ياجوزى وايه كمان ، قلت : واكيد قالوا لك ان الجو هنا جميل وياريت تجيبى جوزك والعيال وتجيوا تقضوا معانا يومين .
المدام : ياسلام هايل ياحبيبى .. طيب وايه رأيك ، قلت : ياهانم إنتى عارفة البير وغطاه أعيد الكلام تانى حرام عليكى بقى أجيب فلوس منين .
المدام: ياحبيبى مش محتاجين فلوس .. ده زوج اختى منصور مسافر الفجر وممكن نركب معاه عربيته يعنى مش هانغرم مصاريف مواصلات ولا حاجة خالص .
ولسه ياحضرات هاصرخ فى وشها تليفونى المحمول رن حمايا على الخط : الووووو ايوه ياعمى إزيك عامل ايه فى المصيف .
حمايا: الحمد لله ياحبيبى الجو هنا ممتاز قوى .. بقولك ايه علشان خاطرى ماتكسفنيش ياريت تيجوا تقضوا لكم يومين معانا هنا فى الساحل الشمالى .
قلت : إنت عارف ياعمى الظروف وأنا كمان مابرتحش مع حماتى ولا بناتها وممكن تحصل مشاكل خلينى بعيد احسن بدل المصيف مايقلب معاكم بغم .
حمايا : تعالوا بس ومالكش دعوة أنا موجود .. هو أنا مش غالى عندك ولا ايه ، قلت : إنت عارف ياعمى أنا بحبك .. خلاص هانيجى مع منصور ان شاء الله .
بس ياحضرات قفلت مع عمى التليفون والمدام فرحت وقعدت تجهز الشنط وهدوم العيال واغراض السفر وتليفون المدام رن حماتى على الخط .
المدام : ايوة ياماما إحنا جايين بكرة الصبح ، حماتى : مانا عارفة بقولك فيه شوية طلبات ياريت تجيبيهم معاكوا وإنتم جايين لان العدد كتير وتقريبا الآكل خلص .
المدام : حاضر ياماما بس أجيب ورقة أكتب فيها ، حماتى : عايزين 10 كليو لحمة كندوز و 5 كيلو لحم مفروم و20 فرخة و3 كيلو كبدة بلدى .
و5 كيلو كبدة إسكندرانى وعلبتين سمنة و3 زجاجات زيت ولو قدرتى تجيبى معاكى بالمرة شوية طماطم وبطاطس وخيار وفاكهه وعصاير وحلويات يبقى كتر خيرك .
وأنا طبعا قاعد هاطرشق من الغيظ وعلى وشك الإنفجار ، المدام : إسمع ياحبيبى عايزين نجيب شوية الطلبات البسيطة دى وناخدها معانا المصيف .
قلت : دى طلبات بسيطة امال لو كانت كبيرة كانت امك طلبت ايه .. وعمالة تقولى مش هانغرم حاجة ياهانم الطلبات دى محتاجة مش اقل من 2000 جنية .
المدام : طيب اعمل ايه أنا اتكسفت من ماما، قلت : وأنا اعمل ايه مافيش معايا فلوس ، المدام يعنى تحرجنى مع ماما لازم تتصرف وتجيب فلوس .
قلت : بقولك ايه بلا مصيف بلا زفت .. أنا استلف علشان المصيف ، المدام : شوفوا الراجل المفترى العربيه هاتخده من على باب البيت للمصيف ومش عاجبه .
