اختلافتنا

وقالت إسعاد: "فى الكورة فى أهلى وزمالك وده له جماهير وده له جماهير وده له جماهير، والجماهير هنا وهنا بتشجع بحماس، ونفسها يكسب كل البطولات ويضم أحسن اللاعيبة ويبقى هو الأول دايمًا، أنا بقول أهلى وزمالك على سبيل المثال يعنى، مع كل الحب والاحترام لكل أندية مصر وجماهيرها الكُمّل، التشجيع الجنونى ده وارد فى نشاط زى الكورة وده مش بيحصل عندنا بس".

وأضافت: "كل العالم عنده مشجعين بيدافعوا عن فريقهم بس يعنى مجانين كورة، ده فى الكورة مقبول، بره الكورة بقى هل يجوز تتحول كل حاجة فى حياتنا لأهلى وزمالك، كل الموضوعات تقريبًا فى كل المجالات تقريبًا أول ما يتفتح نلاقى الناس اتقسمت أهلى وزمالك، مع وضد، وكل واحد بيشجع فريق ويدافع عنه فى الحق والباطل ويتريق على أصحاب الرأى التانى ويمكن يشتمهم وتوصل لأكتر من كدة بكتير، وأنتو عارفين".

وأوضحت: "طب وحياتك عندى وإحنا بقينا عشرة وأصحاب، أنا بتخض لما بلاقى خناقة مثلًا بين الناس اللى بيحبوا الصيف والناس اللى بيحبوا الشتا، معسكرين عمالين يطحنوا فى بعض، وكل واحد عمال يثبت بكل الطرق أن الفصل بتاعه أحسن، الفصل بتاعه هو اللى بيحب الجو فيه اللى بيرتاح فيه اللى صحته بتجى عليه، ببقى عايزة أقول يا جماعة استهدوا بالله لا أنت عملت الصيف ولا أنتى بتجيبى الشتا، الحمد لله فى شتا وفى صيف وكل اللى بيرتاح فى فصل يتبسط فيه، ده إيه المصيبة اللى إحنا فيها دى، قيس على كدة بقى دين سياسة فن طبيخ أزياء ثقافة حتى فى العلوم تلاقى واحد بيتكلم عن نظرية علمية وبيهاجم أصحاب النظرية التانية وشايفهم مش بيفهموا أو مش بيحسوا، الموضوع ده مش سهل ولا هين كدة".

واستكملت: "فكرة أننا نمسك فى خناق بعض على الفارغة والمليانة عملية بتشحن البنى آدم ضد زميله وصاحبه، وحتى ضد أخوه وابن أمه وابوه، الموضوع ده بيخلينا شوية وشوية نتحول لعدائيين، وبيضيق الصدر والأفق والخلق وممكن يتسبب فى أمراض والله، لما تبقى طول الوقت مغلول ده خطر على صحتك يا حبيبى، لما العالم أقر التسامح كمبدأ أساسى له أولوية على كل حاجة، وبيصرف مليارات كل سنة على نشر ثقافة التسامح فى ده مش من فراغ ولا رفاهية ولا قلة مشاكل، أنما إحساس كبير أن العالم فى خطر إذا المواطنين عاشوا فى حالة شحن مستمرة، زى اللى إحنا بنهببها طول النهار دى".

وتابعت: "زمان كانوا بيعلمونا مقولة رأيى صواب يحتمل الخطأ، ورأيك خطأ يحتمل الصواب، وكانوا بيكتبوها على ضهر الكراسات يا حبيبى، وكان مدرس الخط أستاذ فلان الفلانى عليه رحمة الله يخلينا نكتبها 5 مرات بالنسخ و5 مرات بالرقعة كانت درس مهم أوى عشان وإحنا بنكتبها نفتكر أن الواحد مش لازم يتعصب لكل الحاجات بنفس الدرجة، وفى موضوعات مينفعش ومايصحش نتعصب فيها من أساسه مهما حاولنا ومهما عملنا، عمرنا ما هنقدر نوصل لمرحلة أن كلنا عندنا نفس الرأى بالملى كده فى كل حاجة، محصلش، عشان كدة لازم نتعايش، لازم نقبل المختلف، لازم نتعود على أن فى حاجات موجودة مش على كيفنا، نفتكر دايمًا الحاجة اللى أنت محزق ومتزربن عليها أوى دى، ممكن بكرة تبقى عايز تغيرها، وافتكر كلام عمنا شاهين لا تجبر الإنسان ولا تخيره، يكفيه ما فيه على عقل بيحيره اللى النهاردة يطلبه برضاه هو اللى بكرة هيشتهى يغيره وعجبى".