إسعاد يونس
وقالت إسعاد: "فى ناس بتتبرع بفلوس، وناس بتتبرع بحاجات زى الهدوم مثلًا، فى ناس بتتبرع بأكل، فى حاجات كتير ممكن الواحد يتبرع بيها ويعمل خير من الحاجات دى، واللى كتير مننا مش بياخد باله منها، هى بقى إيه؟ التطوع".
وأضافت: "التطوع نوع مهم من أنواع التبرع، الاشتراك فى الحملات، الاستعداد للمشاركة فى الأنشطة بنفسنا، وتنظيم الاتصالات، توصيل الحاجات، كل دى حاجات أصيلة فى أى تطوع ويعتبر من أهم الحاجات اللى الواحد بيتبرع بيها، هنا الواحد بيتبرع بحاجتين مهمين أوى أوى "الوقت والجهد"، بيقولوا أن مثلث الثروة هو الوقت والجهد والمال، فبيحطوا الوقت والجهد قبل المال، والإنجليز بيقولوا "time is money".
وأوضحت: "فالوقت والجهد دول أغلى الحاجات اللى ممكن الإنسان يقدمه فى حياته، كتير من المؤسسات مكنتش بتقدر قيمة التطوع قبل كام سنة فاتت كدة، كان التركيز كله على جمع المصادر المالية أو الحاجات اللى بتيجى بفلوس، لكن دلوقتى ومع تطور شغل المؤسسات دى بدأت تهتم بالتطوع وتشجع عليه، دراسات كتير بتقول إن التطوع ده بيساعد كتير جدًا فى مجال العمل المجتمعى، ومؤسسة مثلًا مصر الخير، عملت أبحاث ووصلت لفوائد كتير جدًا للتطوع، مش هنقدر فى وقت الحلقة نقولها كلها، أنما نقدر نقول مثلًا يعنى أن التطوع بيحطك فى قلب المشكلة، أنت لما تتبرع بفلوس مثلًا، خلاص اتبرعت وخلاص، حتى لو الفلوس كتير، لكن خلاص أنت علاقتك بالموضوع خلصت وممكن تنساه، أنما لما تطوع بعمل حاجة بقى، ده بيزود إحساسك بالمشكلة نفسها".
واستكملت: "يعنى مثلًا لما تتطوع أنك توصل حاجة لناس محتاجين، ده بيديك فرصة لإيه بقى، أنك تشوفهم وتعرف عن قرب عايشين إزاى، إحساسك بيهم أكيد هيكون أكتر بكتير بإحساسك لو اتبرعت بما يوازى قيمة المشوار".
وتابعت: "التطوع كمان بيزود قدرتنا على الحلول الإبداعية، مهو لما تفكر فى مشكلة وتلاقى نفسك وسطها بجد، وسطها يعنى بشحمك وبلحمك، هتلاقى روحك توماتيكى كده، بتفكر فى حل واتنين وتلاتة، هتلاقى نفسك بتحاول تستغل أقل الموارد بتقديم أكبر المساعدات، التطوع برضو بيديك إحساس إنك مش لوحدك يعنى اللى واقف بتساعد، مش طرازان يعنى، مش لوحدك اللى واقف قدام المشكلة، بتشوف بعنيك ناس تانية غيرك، وشوية شوية بتتكون عندك روابط قائمة على فكرة المساعدة، الروابط دى بتكبر وبتوسع وده بيديك أمل، وبيساعدك على الاستمرار، بيخلى تقديم المساعدات جزء أساسى من حياتك، حتى لو كان جزء قليل يا رب يكون ساعة كل سنة، هتحافظ عليه وتنمى وتشجع غيرك عليه، مش بس كدة، غالبًا المتطوعين بيكونوا من الشباب الصغير، ولادنا وبناتنا الجدعان دول، ده بيخلينا نتطمن على العمل المجتمعى، مفيش أى مجتمع بيخلى من وجود ناس محتاجين المساعدة، فإحنا محتاجين نبص لقدام، ونحاول نحافظ على قد ما نقدر على الجهود دى، كون الشباب يتعودوا من صغرهم على النشاط ده، فإحنا بنضمن أن ده هيكون جزء من تكوينهم، ووعيهم، بجد بجد مفيش أجمل من أنك تشوف نتيجة عطائك بعنيك، عشان كده التطوع مهم جدًا".
