إسعاد يونس
وقالت إسعاد: "لو فكرنا فى أحوال الناس فى شهر رمضان هنلاقى فى ناس كتير محتاجين، فى ناس ممكن متلاقيش حق الوجبة، فى أسر محتاجة كرتونة رمضان، ناس كتير وأحوال كتير، مش شرط يبقى الإنسان مش لاقى علشان يحتاج المساعدة أوقات يبقى الواحد فى موقف ما، ويلاقى المغرب أذن عليه وهو صايم لكن لسة بدرى على ما يوصل البيت، خصوصًا المسافرين، كلنا بنسافر من كل حتة فى مصر لكل حتة فى مصر، لو روحت أى مكان فيه مواصلات سفر هتلاقيها على طول مشغولة ومزحومة القطار والسوبر جيت والميكروباصات، كل طريقة بنسافر بيها بتبقى مشغولة".
وأضافت: "اللى بيسافر بشكل اعتيادى من شغله لبيته أو العكس، اللى مسافر فى زيارة، اللى مسافر يعمل واجب، اللى مسافر يخلص ورق، اللى مسافر فى مشوار ضرورى، اللى مسافر فى ظروف كويسة وأفراح، واللى مسافر فى ظروف هم وخرج من بيتهم يلحق أول وسيلة مواصلات لبلد تانية فى ظروف مش بس من القاهرة للقاهرة ممكن من الإسكندرية للسويس، من بورسعيد لدمياط، من الصعيد لمطروح، حركة السفر فى مصر بسم الله ما شاء الله مش بتهدى، محدش فينا بيبقى ضامن ظروف سفره، وممكن وسيلة السفر تتأخر طبيعى، تتعطل وارد، ممكن أنت مش مقدر المسافة صح مثلًا بتحصلنا كلنا يعنى، ممكن تكون عامل حسابك وأى حاجة تحصل للأكل اللى معاك خصوصًا فى الحر، ممكن أى ظروف تحصل هوب تلاقى نفسك محتاس، الحمد لله عندنا مؤسسات بتفكر فى كل الناس، وحاطة قدام عينيها هدف أنه على قد ما نقدر، ميكونش فى إنسان بيعانى، على الأقل، فى رمضان، وعلى الأقل الأقل، فيما يخص الاحتياجات الأساسية".
وأوضحت: "من هنا بقى بدأت حملات إفطار المسافر، مؤسسة مصر الخير بتنظم الحملة دى من السنة اللى فاتت، ووفرت 180 ألف وجبة خفيفة للمسافرين فى كل وسائل المواصلات، والسنة دى برضو بستمر فى الحملة للسنة التانية على التوالى والهدف توفير 480 وجبة".
طبعًا الموضوع ده زى أى موضوع وأى حملة بيحتاج شبكة ضخمة متكاملة من العمالة والمنظمين، تحديدًا النقط ووسائل المواصلات اللى عندها بتكتر احتمالات وجود مسافرين محتاجين للوجبات دى، علشان كدة المسافرين السنة اللى فاتت لحظوا وجود الوجبات دى فى محطات القطار، وفى طرق عربيات الأجرة مثلًا، عند البوابات، فى كل مكان محتمل يعدى عليه مسافرين، بالظبط زى الشباب الجدعان اللى بنشوفهم ساعة المغرب فى الشارع، بس دول بقى بره على الطرقات، ناس بيسيبوا بيوتهم وفطارهم وبيتطوعوا اختيارًا عشان يساعدوا المسافر إنه يلاقى وجبة إفطار".
وتابعت: "هنا بقى مش بيكون فى فرق بين المحتاج وغير المحتاج، كلنا هنا وارد نلاقى نفسنا فى الموقف ده، ونلاقى نفسنا محتاجين، التحية كل التحية لكل الناس اللى قاعدة وعمالة تفكر فى الأحسن والأصلح، الناس اللى حاسة بظروف الناس، الناس اللى كل حلمها أن كل واحد فى الـ90 مليون وزيادة يبقى مش محتاج حاجة، مش بيبص حواليه مستنى إيد تتمد له فميلاقيش، ينفع فى بلدنا الحلوة دى ميلاقيش؟".
