لا تعطنى سمكة لكن علمنى الصيد

وقالت إسعاد: "للأسف الأسيف الشديد بالجامد أوى بقينا نتريق ونسخر ونعمل كوميكس أو تريقات على حكم عظيمة لها معانى مهمة، معانى بتساعد اللى ياخدها بجد أنه يتقدم ويمشى لقدام ولفوق، من الحكم العظيمة دى، حكمة اتعلمناها زمان وحفظناها وبقت جزء من وعينا ووجدنا، حكمة بتقول إيه؟ لا تعطنى سمكة لكن علمنى الصيد، مش علمنى الصيد والنبى يا أحمد، مسمهاش كدة، يادى النصيبة اسمها لا تعطنى سمكة لكن علمنى الصيد".

وأضافت: "هى الجملة دى اللى بهدلناها معانا فى السنين الأخيرة واتعمل عليها ألف نكتة ونكتة، لما تفكر فى الحكمة دى هتلاقيها محتاجة فى ترجمتها كلام كتير أوى وشغل أكتر، سهل تساعد شخص بإنك تقدمله فلوس مثلا، صحيح أن الفلوس مهمة طبعًا، لكنها أسهل حاجة لما نتكلم عن التنمية، الشغل الصعب هو أنك تأسس صح، تأسس الإنسان، الإنسان اللى يقدر يكسب الفلوس باستمرار، هتساعد شخص بالفلوس هتديله كام يعنى؟ أيًا كان المبلغ هيتصرف، وهيرجع الإنسان يحتاج تانى، ومرة فى مرة هيتعود على الطريقة دى، ويبقى مش منتج، وأكيد طبعًا مش هو ده المطلوب".

وأوضحت: "العالم كله دلوقتى شغال الخدمة المجتمعية بفكر التنمية قبل فكر المساعدة، بحيث إيه؟ بحيث يتحقق التكافل الاجتماعى مع التعليم مع الصحة مع البحث العلمى والابتكار شبكة متكاملة، تسند بعضها وتساهم فى إنسان منتج إنسان يعرف قيمة الحاجة".

واستكملت: "كل ده لازم يتعمل فى شكل مؤسسات، مؤسسات تكون حاطة قدام عينيها إزاى تساعد فى إنها تقضى على البطالة والأمية والجهل والظاهر اللى عاملة زى السوس اللى بينخر فى أى مجتمع، يبقى على الدنيا السلنكاتية الفلانكتية، خلاص باظت الدنيا، عشان المؤسسات دى تعمل شغلها صح، لازم يبقى عندها الحد الأقصى من الشفافية من الاحترام والمصداقية والاحتراف فى الشغل والكفاءة، لازم تبقى فى خطة ورؤية ويكون الهدف المحطوط أنك تستمر لقدام مش سنة ولا اتنين ولا عشرة، لا أنك تبقى جزء من المجتمع إن شاء لله لـ100 سنة لقدام، طول ما فى ناس وطول ما فى تفاعل وطول ما فينا نفس أنت موجود".

وتابعت: "لازم نبطل نعتمد على الأشخاص نبنى فكر مؤسسى، ده يروح ده يجى مفيش حاجة تتأثر، ممكن تطور بس متتغيرش ولا تقلش، كمان لازم الشغل على مستوى مصر كلها، نحاول نبص بره المركز اللى اسمه القاهرة ونعرف أنه فى محافظات ومراكز وقرى عايزة هى كمان أنه يحصل فيها تنمية، وده اللى يأكد أننا محتاجين نتعلم الصيد أكتر ما إحنا محتاجين السمك، لأن السمك مهما كتر، مش ممكن هيكفى كل الأفواه اللى مستنياه، لما ببوص حواليا بلاقى أننا بدأنا نعرف الطريق ده، ده مبقاش مجرد كلام إنشاء فى برنامج راديو، بقى عندنا بالفعل مؤسسات شغالة على أسس علمية، وبتلفت نظرى فى السياق ده، مؤسسة مصر الخير، اللى عرفت أنها بتحتفل بمرور 10 سنسن على إنشائها، الاستمرار 10 سنين فى حد ذاته شىء مبشر، المهم أننا نفضل حاطين قدام عنينا، أن تعلم الصيد أهم بكتير من السمك، شوفت بقى الجملة البسيطة اللى إحنا بتريق عليها لما فكرنا فيها بشوية جدية وديتنا لفين ولفين ولفين، مش آن الأوان بقى نرد الاعتبار لحكمة الأجداد، ونعرف أنها مجتش من فراغ، ولا رايحة للفراغ، ولا هى وسيلة للتسلية فى أوقات الفراغ".