إسعاد يونس
"والله العظيم والله العظيم تانى وما ليكو عليا حلفان أنا بتضايق أوى لما بلاقى أغلبنا مش عارفين مفيدة وتوحيدة، ولا عارفين مسيرتهم العظيمة على كل المستويات".
"مين مفيدة وتوحيدة؟ دول مفيدة عبد الرحمن أول محامية مصرية، وأختها توحيدة عبد الرحمن أول طبيبة تتعين فى الحكومة المصرية، وتانى طبيبة مصرية على الإطلاق بعد الدكتورة هيلانا سيداروس".
"مفيدة وتوحيدة أختين من أسرة مصرية كانت عايشة فى الدرب الأحمر، الحى المصرى العتيق العريق ده، اللى كان حى إيه بقى، الأفندية، ومنهم عبد الرحمن أفندى والد مفيدة وتوحيدة".
"الراجل العظيم ده اللى كان خطاط وصاحب مطبعة وكتب بإيده المصحف الشريف 19 مرة، الراجل ده من 90 سنة وأكتر قرر يعلم بناته ويوصل بيهم فى التعليم لأعلى المستويات لدرجة إنه بعت البنت الكبيرة توحيدة فى بعثة لبريطانيا عشان تدرس الطب، أه والله زى مبؤلك كده بريطانيا حتة واحدة".
"كان نفسه أختها الصغيرة مفيدة تدرس الطب زى أختها توحيدة، لكنه مفرضش عليها الطريق وسابها تختار، وهى اختارت تتجوز وتكمل فى دراسة الحقوق، فاتجوزت اللى اختارته ودرست الحقوق وبقت أول محامية مصرية".
"بمناسبة الجواز بقى، الأختين مفيدة وتوحيدة اتجوزوا أخين، هما محمد ومحمود عبد اللطيف، محمود عبد اللطيف جوز توحيدة كان مستشار كبير وتقريبا كده درجته تعادل نائب وزير العدل، وكان القاضى اللى حكم فى واحدة من أهم القضايا بتاعت الخمسينات الشهيرة باسم "الجاسوسية الكبرى"، لكن الراجل ده وقف جنب وفى ضهر زوجته عشان تأدى مسيرتها الطبية".
"لما كانوا مخطوبين، المستشار محمود سافر فى رحلة لبريطانيا مخصوص عشان يشوف الأماكن اللى كانت عايشة فيها خطيبته، عشان لما يتجوزوا وتتكلم عن أهم سنين عمرها اللى قضتها فى إنجلترا، يكون عايش معاها ذكرياتها، ده سيادة المستشار اللى كانت كلمته فى المحكمة بتهز دول عظمى".
"لما مفيدة اتقدمت لكلية الحقوق عشان تبقى طالبة فيها، عميد الكلية اشترط موافقة جوزها باعتبارها زوجة وأم، والحقيقة إن العميد كان مستغرب إن فى واحدة ست هتدرس القانون، وكان السؤال هتعمل بيه ايه؟ فى واحدة ست هتترافع فى المحكمة؟"
"محمد عبد الللطيف جوز مفيدة قابل العميد ومضاله تعهدات، واتخرجت واترافعت فى المحاكم، مش بس كده، دى فتحت مكتب مستقل، وجوزها كان أول داعم ليها، ووصلت إنها تولت أرفع المناصب محليا ودوليا، كفاية بس أقولك إنها كانت رئيس الاتحاد الدولى للمحاميات والقانونيات ".
"فى وسط ده، مفيدة وتوحيدة كل منهم كونت أسرة وخلفت أولاد، مفيدة 5 وتوحيدة 7، هما كانوا قبل تنظيم الأسرة، إنما كل واحدة منهم قدرت تربى أولادها وتعلمهم أحسن تعليم، مش بس من الناحية العلمية، لكن كمان كأسرة بكل معانى الاسرة المحترمة".
"مفيدة وتوحيدة مش رقم، مش حكاية المحامية رقم واحد والطبيبة رقم اتنين، إنما كانوا نموذج للى نفسنا كلنا نشوفه ونسمع عنه، بنتين بقوا سيدتين عاشوا حياة مديدة من غير ما يسعوا لأضواء أو شهرة أو يستفيدوا شخصيا أكتر من إنهم يعيشوا حياة بسيطة".
"عندى عنهم حكايات وحكايات وحكايات للأسف مدة الحلقة متكفيش أحكيهالكم كلها، إنما أتمنى إنكم تدوروا عن سيرتهم ومسيرتهم، وأوعدكم كل حرف هتقروه هتقولوا الله، الحمد لله إن الكلام ده حصل فى مصر فى يوم من الأيام.. فوتكوا بعافية".
