إسعاد يونس
وقالت إسعاد: "فيديو انتشر فى الفترة اللى فاتت، الفيديو فيه راجل فوق السبعين فى المستشفى مع مراته ست عجوزة ومريضة، الست تعبانة يا ولداه ونايمة فى السرير ومن الألم مغمضة عنيها ومستسلمة لوجعها، الزوج المسن بيضحك ويهزر معاها وماسك مشط وبيسرح لها شعرها عشان شكلها يبقى حلو فى الفيديو، الست مستمتعة جدا بالدلع الزوجى والحنية المفرطة دى رغم ألمها الواضح وبترد على جوزها وبتكلمه، حاجة كده فيها إنسانية وسلام ووداعة وعرفان بالجميل، ورقة وجمال تنهى كل الحروب، بجد والله زى مبؤلكم كده".
وأضافت: "الفيديو ده بالحالة النادرة اللى فيه أن الواحد يشوف حاجة لسة فيها روح وريحة، حاجة كده شبه صوت فيروز، ولا حتة مزيكا لعمر خيرت فى زمن المرجيحة والزحليقة، ومزيكة فحر ومحر، حالة جنون العلاقات اللى بنعيش فيها بشكل يومى، تحس أن الطرفين فى أى علاقة داخلناها متحفزين لبعض، وقاعدين لبعض بكم النصايح والبوستات العظيمة، على فكرة عزيزتى حواء من حقك تكتمى على عصفورة قلب الراجل لحد ما يبان له صاحب، قوم لما يبان له صاحب تغُزيه هو وصاحبه".
وأردفت قائلة: "وعلى الطرف التانى تلاقى بوستات عزيزى الدكر شبكة مش جايبين، مهر مش دافعين، فاتحة مش حافظين، تلاقى واحد طالع فى الفيديو يبرق ويزغر ويجعر ويقول شرعا يحق للزوج كيت وكيت وكيت، هوبا تلاقى واحدة محمرة عنيها ومطولة ضوافرها وسنة أسنانها وتقول شرعا بقى الراجل ملتزم بكيت وكيت وكيت، وده يخش يحامى لده ودى تخش تحامى لدى وتولع الدنيا وتبقى حرب شعواء عبر الفضاء الإلكترونى وكل اللى عنده معزة يلمها، والسلام عليكم ورحمة الله وبركاته".
وتابعت قائلة: "وسط الزحمة وحالة الشحن والشحن المضاد دى الواحد بيفتقد الكلام الحلو والرومانسية والحكايات الحلوة شوية الأمل والتفاؤل وتطمين اللى من غير تلزيق بالمناسبة، فاكرين كلمة هى الدنيا لسه بخير؟ راحت فين؟ دور عند يا بنى هناك شوفها محشورة بين مخدات الكرسى، ولا مرمية فوق أنهى دولاب، حد يستدعيها لنا ويحضرها لنا حتى، هو مين اللى كان صرفها أصلا؟ مهى كنت موجودة ومطمنانا أحيانا، الدنيا لسة بخير، مهو مش معقول حتى الناس اللى عايشين معاهم تحت سقف بيت واحد بيوصل لنا رسايل سلبية منهم ، ده اللى عايش مرتاح مع شريكه يخش نص ساعة على الفيس بوك ولا يتفرج له على كام فيديو نصايح من إياهم ممكن يروح يغز شريكه احتياطى يعنى، ويوم ما يبقى سوى وماصبهوش أى شحنات سلبية يروح يصرخ له يسرعه".
وختمت قائلة: "تحضرنى جملة جميلة بتقول كتروا من الحب تلاقوا فى الضلمة ألف قمر يلهوى على الجمال، كتروا من الحب تلاقوا فى الضلمة ألف قمر، كتروا من الحب يا بشر، كتروا من الحب يا أفندية، كتروا من الحب يا مدامات، كتروا من الحب يا عيال يا اللى لابسين بامبرز حتى، كتروا من الحب وحطوه قبل نية السوء، وافتراض نية السوء كمان، كتروا من الحب عشان نلاقى مرادفات التسامح والمغفرة وتسقيط الفارغة وتكبير الدماغ والتغاضى، رجعت لقواميس حياتنا، قوم يرجع التقبل وحبيبك على عيبه وحبيبك اللى يبلعلك الزلط، ونلاقى الدنيا لسة بخير، الجملة اللى تاهت وخرجت ولم تعد".
