إسعاد يونس
قالت إسعاد: "قاعدة من كام يوم بتفرج على فيلم أنا وبناتى، قوم لقيت لكم ناهد شريف، الله يرحمها، وزكى رستم، الله يرحمه، لما سألها بتعملوا إيه بالشمع ده؟ راحت قالتله قولنا نخليه عشان لما فار السبتية يجى يا بابا، فار السبتية؟ إيه علاقة الفار بالسبتية بالشمع؟ بأن الفار ييجى أصلا، الحقيقة أن ليهم علاقة وطيدة ببعض، أه والله زى مبؤلكم كده استنوا بس هحكلكم حكاية فار السبتية، فى أوائل الخمسينيات انقطع التيار الكهربى عن حى السبتية المجاور لرمسيس، وفضلت الكهربا مقطوعة فترة طويلة جدا، قوم طلعت تانى يوم الجرايد تقول سبب انقطاع التيار الكهربى، قالك يا سيدى فى فار تسلل للمحطة الرئيسية وقرقض فى الغلاف البلاستيك للأسلاك فحصلت قافلة وانقطع التيار، بس الحق الشهادة لله الجرايد قالت إن الفار الملعون أخد جزاءه واتكهرب ومات".
وأضافت: "قوم الفار ده بقى أشهر من ميكى ماوس وفرافيرو، لدرجة أن الناس بقت لما تقول النور راح ولا الكهربا قطعت بقت تقولك فار السبتية، أه والنبى بأمارة ناهد شريف فى الفيلم، الموضوع ده بقى انتشر مش بس فى القاهرة، وبقى مرادف لانقطاع التيار حضور فار السبتية اللئيم، اختفى فار السبتية فى ظروف غامضة حتى السبعينات، ماتعرفش بقى الفيران انقرضت ولا مابقوش يحبوا أسلاك الكهربا، بس رجع تانى بقى متخفى فى صورة الماس الكهربى، الحقيقة أن الماس أصيل عن الفار، الراجل تنّو معانا من السبعينات لحد النهاردة، يا ولداه شيال هموم الصراحة، كل مصيبة يطلع يتصدر فيها، ويمكن 90% من حرايق ومصايب الكهربا شايلها الجدع لوحده ولا يشتكيش، أه والنبى يا كبد أمه زى مبؤلكم كده".
وتابعت: "بجد الحقيقة بقى سواء من فار السبتية ولا أيتها عذر من النوعية دى بنشيله لأغلب الكوارث اللى الصراحة العنصر البشرى والإهمال وتكبير دماغه هما السبب الرئيس فيها، بقت حجته ماسخة الصراحة، مابقتش مبلوعة، كل ما النكتة بتتكرر كل ما بتكون سم ناقع كده ومش مقبولة، مهو لو المستمع عاقل بردوا يا جدعان يقول إن الفار هو السبب ولا الماس ولا عقب السيجارة ولا انعدام التهوية ولا الكاميرا كانت عطلانة ولا السيستم كان واقع ولا أيتوها عذر من دول، طب مين ساب الباب للفيران أو استلم المؤسسة وفيها أسلاك مش معزولة ولا قابلة للماس؟ مين اللى رمى عقب لسيجارة ولا سابه يترمى؟ مين اللى ساب السيستم يقع ولا الكاميرا بايظة؟ من الآخر في واحد مسؤول، الأكيدة أن الأجهزة مابتشتغلش لوحدها ولا السيجارة بتقع لوحدها ولا السيستم اللى بيقع ملوش اللى يقومه".
وختمت قائلة: "اللى بيتكسر فى حد كسره أو كان السبب فى كسره، وكل مصبية وراها عامل بشرى، لما نحاسب الغلطان ونعرفه أن الله حق والشغل حق ومال البلد حق، زى ما فار السبتية انقرض هينقرض راخر الماس والعقب والسيستم هيشتغل زى القرد وكل الشمعات هتتكسر ولا يبقاش حاجة تتعلق عليها، أه وربنا زى مبؤلكم كده.
