إسعاد يونس
وقالت إسعاد "فى تعبيرات يا أخى من كتر ما استخدمناها واستعملناها مبقناش شايفين لها أهمية خالص زى القوة الناعمة، أهو تعبير مستخبى وسط نشرات الأخبار والأحداث السياسية والاقتصاد رغم إنها ملهاش دعوة بكل ده ومتقلش أهمية عن كل ده".
وتابعت: "القوة الناعمة دى ياما شالت مصر سنين طويلة ومازلت بتدى وزن كبير جدًا للبلد، وصل الكلام؟، لو عاوزين نعرف يعنى أيه القوة الناعمة لما بنسافر بلد عربى أو سألنا حد هناك أو سألنا حد كان هناك ورجع، يعنى أيه أم كلثوم أو عادل إمام أو فريد شوقى أو سعاد حسنى أو نجيب محفوظ أو يوسف إدريس أو نجيب الريحانى أو توفيق الحكيم أو محمد حسنين هيكل محمود الخطيب أو حمادة إمام أو عبدالحليم حافظ أو غيرهم غيرهم قائمة طويلة جدًا".
وأكدت إسعاد: "الكلام ده مش مبالغة فى مئات ومئات القوائم من المطربين والفنانين والرياضيين والكتاب والصحفيين والمنتجيين ومخرجين وصحفيين وثقافيين وناشرين وراقصين وراقصات ورياضيين وغيرهم وغيرهم، عملوا لمصر قوة كبيرة فى المنطقة، قوة من غير سلاح ولا سياسة، هى دى القوة الناعمة، مش معنى كده إن مصر معملتش غير كده، محدش عاقل يقدر يقول كده.. مصر طول عمرها قائد ورائدة فى مجالات كتير جدًا، أنا بس بركز على حاجة مبقناش نديها أهمية كافية".
وأضافت: "فى معلومة من كتر ما قولتها فى أماكن كتير حاسة أن الناس ممكن تكون زهقت منى ومنها، لكنها حقيقة ولازم نفكر بعض بيها، وبكل قوتنا نستعينها وهى إن السينما كانت تانى مصدر للدخل القومى بعد القطن، بعد ما حصل نجيب محفوظ على جائزة نوبل فى الأدب، بدأت كافة دور النشر العالمية تبحث عن الكتاب والأدباء المصريين، ويمكن العرب عمومًا مش نجيب بس، وبدأت حركة ترجمة عالمية واتبنت مؤسسات واتشكلت دوائر، مش وقته ولا مكانه أن إحنا نقعد نناقش ليه القوة الناعمة مبقتش زى عصور سابقة".
واختتمت: "اللى عايزه أقوله إن المجالات دى ناس بتعتبرها غير مهمة دلوقتى، لكنها فى الحقيقة الفن والرياضة والثقافة قوة كبيرة جدًا، ومهمة جدًا لينا، ومناسبة لينا لأنها مش مكلفة زى الصناعة والتجارة والسياسة والتسليح، مش محتاجين فلوس كتير أووى يعنى علشان يبقى عندنا أدباء وفنانين ورياضيين، إحنا شعب فنان بطبيعته، الحاجات دى موجودة فينا وفى جناتنا ودمنا من زمان من أيام اللى بنوا الهرم ومن أيام نجارين الأرابيسك اللى اتخدوا واترحلوا غصب ومن أيام العيال اللى عملوا عرايس من الطين والعجين والفلاح اللى غنى عطشان يا صبايا وسلم عليا، إحنا شعب مبدع بس محتاج تركيز واهتمام، وهتشوفوا عجب العجاب.. أه والله العظيم زى ما بقولك كده".
