إسعاد يونس
قالت إسعاد: "يا أخويا حكاية الفيديوهات اللى بقت بتشتغل لوحدها دى وأنت معدى عليها بقت توريك العجب، يبقى لا بيك ولا عليك وتبقى حى الله كده بتتفرج على التايم لاين تلاقى الفيديو نط قدامك وقرر أنه يشتغل ويوريك محتواه من غير رغبة حقيقية منك خالص، الأغرب أنك بتلاقى نفسك مسحول مع الفيديو ورايح للآخر وتتأثر وتضحك أو تبقى عاوز تولع فى روحك بجاز، طب وليه وأنا مالى أصلا مكنتش عاوزة ألعب أصلا، القصد وأنا بعيش واحدة من التجارب دى اشتغل قدامى فيديو من دول فكالعادة اتشديت قوم كملت للآخر وياريته ماحصل"
وأضافت: "الفيديو عبارة عن مزيكا لمهرجانات فى الخلفية والكاميرا ماشية فى شارع شعبى، وبتستعرض كم كبير من الحلل وأطقم الصينى وأطقم التيفال والبايركس وأطقم الكوبيات والمعالق والأطباق والصوانى، وبعد كده جيه دور المفروشات دست من اللحفة والبطاطين والمخدرات والستاير والسجاجيد وأكوام من الفوط والملايات حتى الحصير البلاشتيك كان موجود، وأخيرا بقى مع فقرة الأجهزة الكهربائية اللى كل حاجة كانت موجودة فيها لدرجة الكاسيت اللى انقرض كان موجود بكيسته، فى البداية افتكرته افتتاح واحد من مولات العرايس دى اللى بتفتح فى المحافظات دى والفيديو دعاية يعنى بمناسبة الافتتاح".
وتابعت: "الكارثة أن بعد الاستعراض ده جت تهانى وتبريكات على الشاشة للعريس للعريس فلان الفلانى وأن ده شوار العروسة اللى كان بيحتل شارع كامل على الجانبين ده، بصوا الصدمة أخدت منى وقت طويل حبتين، على مجمعت نفسى كده واتفرجت على الفيديو مرة واتنين وتلاتة وعدين الحاجات اللى لو كل حاجة منها طقم تبقى تلاتة، ولو قطع يبقى فى منها دستتين تلاتة، وجمعت أن دى محافظة فى الدلتا وأن دى قرية بسيطة، فكرة أن شوار العروسة ممكن يتحول يبقى لمحتويات أجهزة منزلية كامل دى صادمة بالنسبة لى".
وأردفت قائلة: "وبعدين ده إحنا بنتكلم فى أسر متوسطة يا جدعان وأقل من المتوسطة، إزاى يوصل بهم الموضوع عشان كلام الناس والعادات والكلام الفارغ اللى بالكم فيه ده يتصرفوا بالسفة ده ونرجع نقول الغارمات الحقوا قضايا وندور على مين يتبرع يفك كرب فلانة وعلانة وترتانة، هو سؤال بس بسيط كده، هل ياترى يا هل ترى من شروط الجواز شرعا وقانونا العروسة تيجى بـ17 طقم حلل واحد ألمونيا وواحد تيفال وواحد جرانيت وواحد بازلت، فدونا يا دار الإفتاء متجوبينا يا كنيسة متجوبونا يا قانون الأحوال الشخصية، على قدر علمى المتواضع إن الجواز جواب وقبول وإشهار فقط، مافيهوش حلل ولا صينى ولا كاس الدبل خالص خالص، أه وربنا زى مبؤلكم كده داهية لتكون دى معلومة جديدة ولا حاجة".
وختمت بقولها: "يا بشر يا ناس يا عاقلين يا كاملين بطلوا قولت كلام الناس مقالوها فى الأغانى كلام الناس لا بيقدم ولا يأخر، وقولناها قبل كده مفيش كائنات حية بتاكل وش كائنات تانية دى إشاعة مغرضة وعهد الله، بالعقل والنبى بالعقل عشان خاطر ربنا بالعقل عشان فى الزمن ده والظروف دى بقى النوع ده من التصرفات بيخرب بيوت مابيفتحش بيوت، بالعقل".
