إسعاد يونس
قالت إسعاد يونس: "سنة بتروح، كان فيها الحلو وفيها المر، وسنة بتهل هيكون فيها الحلو وهيكون فيها المر، ما هى دى سنة الحياة، وهو ده سر جمالها برضه، آه والله زى ما بقولكم كده، ولولا الصعوبات ما تعرفش قيمة السهل، والضلمة بتعرفنا قيمة النور، وإحنا ما نملكش مع بداية السنة إلا إننا نحلم، وندعى ربنا من قلبنا إنه يبارك ويزيد فى الحلم، ويهون المر".
وأضافت: "نحلم بعالم يحترم الإنسان فعلا لا قولا، عالم يفكر إزاى يقدر يحافظ على حياة كل إنسان على وجه الكوكب، أيا كان شكله، أو لونه أو جنسه أو عقيدته، عالم مش بيميز ده عن ده، ومش بتحصل فيه النزاعات على أتفه الأسباب، وأحيانا بدون سبب، عالم يغير أولوياته من السباق على التكويش وفرض السيطرة وفرد العضلات، واستعراض القوة وتوسيع النفوذ، ويحط قدام عينيه أولا إن الكوكب ده مش هيعمر إلا بالتوازن فى كل حاجة".
وتابعت إسعاد يونس: "نحلم ببلدنا بتعدى كل الصعب، وبتقف على رجليها، زى ما عودتنا طول تاريخها اللى عمره أكبر من إننا ندركه أو نوصل لبدايته، عمرها أكبر من التاريخ فعلا، نشعر فيها بأمن وخير وسلام، وننتصر على جميع المحن، على أى حاد حاول أو بيحاول أو هيحاول يخربها، أو يصيبها بأى شر أو مكروه".
واستطردت: "نحلم بناس بلدنا جميعا، حالهم أحسن ودنيتهم أطيب، الناس دول إحنا جميعا نستاهل كل حاجة فى الدنيا، مش تعصب والله، الواحد لف ودار وعرف وشاف، مشافش شعب طيب وغلبان وبشوش وقلبه أبيض، حتى وهو بيغلط زى الشعب ده".
وقالت يونس: "بنعمل أخطاء أيوه يمكن أخطاء كتير كمان، لكنها بتكون أكتر نتيجة لطيبة قلبنا، وعن غير قصد أو نية الأذى، نحلم بقى إن الأخطاء دى تقل، ويارب تختفى نوهائى يبقى جميل، ونعرف جميعا إن البلد، أى بلد عاملة زى السفينة، لو حد قرر يعمل فتحة صغيرة، صغيرة خالص فى الحتة اللى هو فيها، فالناتج السلبى هيكون على الكل وهو أولهم، بنحلم إننا منزدش 2.5 مليون طفل، نفسى لما أعدى على البتاع ده بتاع التعداد ده ملاقيهوش عمال بيقلب كل فيمتو ثانية، ويعلن نزول مولود جديد، غالبا هو الأخ الخامس أو السادس أو السابع أو الثامن لأسرة مش مستحملة وماشية بالتيلة".
وأضافت: "بنحلم إن ربنا يخفف عن ولادنا أعباء الزمن الصعب ده، الزمن اللى صعوبته فى سهولة أدواته، المعلومة بتوصل أسهل كتير عشان كده بتوصل مش مظبوطة، وزى ما جت سهلة بتروح سهلة، أقول تانى؟ هقول، زى ما جت سهلة بتروح سهلة، ومش بتراكم خبرات.
بنحلم فى حياتنا الشخصية بحاجتين اتنين ملهمش تالت يارب يارب يارب الستر وراحة البال، جدتى وجدتك اللى فى يوم من الأيام قالت الدعاء ده كانت فى ساعة تجلى، ولخصت فلسفات كتير جدا، وكلام محتاج كتب يتكتب فيها، الستر وراحة البال، هما دول وأى حاجة تانية تفاصيل، بنحلم برخاء أكتر وشغل أكتر وفن أكتر وثقافة أكتر وحب أكتر وأكتر وأكتر.. بحبكم".
