الفنانة صباح
العنوان فعلا كان جاذب لناس كتير، ولما تقرأ الخبر هتلاقى تفاصيل أكتر تشدك، زى شهادة الخدام اللى قال إنها خرجت فى يوم الساعة 11 الصبح ولما سألها رايحة فين رفضت إنها ترد رغم أنها كانت وهى نازلة لازم تقوله رايحة فين عشان لو حد حب يوصلها.. ما هو مفيش موبايلات وقتها.
واللى زود من جرعة الإثارة إن الخدام قال إنها نزلت فورا بعد ما جالها تليفون مجهول، ولما جوزها أنور منسى رجع وسأله عن اللى حصل كان مستغرب جدا لأنها أول مرة تنزل من غير ما تقوله رايحه فين.
منسى زى ما مكتوب فى الخبر مسك سماعة التليفون وفضل يسأل عليها كل اللى يعرفوها ولما لقى مفيش فايدة وعدى 24 ساعة من غير ما يوصل لأى نتيجة خد عربيته ونزل يلف فى الشوارع وهو بيسأل نفسه "يا ترى ايه اللى حصل وخلاها تختفى كده" لكن فى النهاية ماوصلش لأى إجابة.
فضل اختفاء صباح واختها حديث الوسط الفنى كله لمدة أسبوع، لحد ما اجمع الكل على أنها اتخطفت، لكن فى يوم رن التليفون فى بيت المنتجة أسيا الصديقة المفربة لصباح، وكان على خط نجاة اخت صباح اللى قالت لاسيا انهم بخير، وانهم سافروا اسكندرية بعد حادثة قتل ابوهم، لان صباح شاكه ان جوزها هو اللى قتله.
سمع انور منسى الكلام فاتجنن، وقال انه مايعرفش اصلا ان ابو صباح اتقتل، وانه شافه مرة واحدة بس فى حياته، ولما حاول انه يتصل بصباح عشان يثبت لها براءته رفضت ترد عليه واختارت انها تعيش بعيد عنه، واللى زاد جنونه اكتر انه عرف ان اخت صباح اشتغلت فى كبارية فى اسكندرية فسافر عشان يحط حد لكل اللى حصل.
اللذيذ بقى أن آخر فقرة فى الخبر صدمت كل القراء، لما المحرر كتب وقال: "هذا ملخص ما تردد فى الوسط الفنى هذا الأسبوع بخصوص الحادث، ولكن دهشة الوسط الفنى لن تستمر طويلا حين يعرف الجميع أن دور أنور منسى فى هذا الحادث هو دور حسين صدقى ودور شقيقة صباح الصغرى هو دور لبلبة فى فيلم يا ظالمنى الذى سيعرض فى عيد الفطر".
