محاولة اغتيال محمد عبد الوهاب
عبدالوهاب اعتذر للناس اللى موجودين معاه وقالهم لازم أرجع البيت، ولما وصل العمارة، لقى واحد واقف وبينادى عليه فافتكره معجب، فابتسم له ودخل وإذا بهذا الرجل يدخل وراه ويتسوقف عبدالوهاب ويسأله: أنت مش عارفنى ولا إيه؟ فـ عبدالوهاب قاله: لا والله مش واخد بالى، فقاله: مش واخد بالك.. أنا أحمد فرج وعايز المليون جنيه اللى عليك.
عبدالوهاب حس إن الراجل بيتكلم بجد فسأله مليون جنيه بتاع إيه؟ فرد وقال: حق الألحان اللى أنت سرقتها منى، وهنا قرر عبدالوهاب إنه ينهى المحادثة العبثية دى وقاله "هو أنا أعرفك أصلا علشان أسرق منك ألحان.. وساب الراجل وراح ناحية الأسانسير، وإذا بالرجل يشده من ياقة الجاكته ويقوله تعالى هنا، أنت إزاى تنسى الماضى، وهوب طلع الراجل طوبة من جيبه وبدأ يضرب عبدالوهاب فى راسه، وبعدها خرج مقص من جيبه التانى عشان يضرب عبدالوهاب وكان مصمم إن المقص يرشق فى عنيه".
عبدالوهاب بدأ يقاوم وينده فى نفس الوقت على البوابين وجه رجال الشرطة اللى كانوا موجودين فى عمارة مجاورة لحراسة أحد الوزراء وقبضوا على الراجل وجرى عبدالوهاب على شقته فمراته أول ما شافته صرخت وطلبت الدكتور اللى جه جرى ولما شافه حالة الانهيار العصبى اللى هو فيها والدم اللى سايح من راسه نقله المستشفى، وفى ظرف نص ساعة انتشر الخبر فى الوسط الفنى وبدأ كل الفنانين يتوافدو على المستشفى.
فى الناحية التانية كان وكيل النيابة بيحقق مع أحمد فرج اللى قال إن كل ألحان عبدالوهاب اللى قدمها لأم كلثوم هى فى الأساس ألحانه، ولما راح لعبدالوهاب يطلب مليون جنيه مقابل الألحان دى إداله معاد ومجاش، فراح له مكتبه، وإداله معاد تانى ومجاش؛ فقرر إنه يروح له البيت عشان يقابله.
انتهى التحقيق مع فراج بتحويله لمستشفى الأمراض العقلية وطلب توقيع الكشف عليه، واستعجاله، وبعد انتهاء فترة الاختبار فى المستشفى طلع التقرير، وقال إن فراج مختل عقليا، وبناء عليه فضل فى المستشفى مخرجش.
