عمر الجيزاوى
لكن قبل الريس ستمونى، كان فى واحد برضه دماغه مختلفة كده، بيشوف الناس رايحه فين ويمشى عكسهم عشان يطلع الدرر والألمظات اللى يتحف بيها جمهوره، فغنى للبراغيت والنشوء ولحمة الراس والقصب والتفاح والعصايا والفاكك والمفكوك، إنه يا سادة الفريد المتفرد عمر الجيزاوى.
وعمر السيد سالم سالم الجيزاوى، اتولد فى أبو تيج فى محافظة أسيوط يوم 11 مايو سنة 1917، وبما إن أبوه كان مقاول إتربى عمر وسط العمال والصنايعية الشقاينين الكادحين، واللى كان صوته بالنسبة لهم وهما بيشتغلوا وسيلة الترفيه الوحيدة.
بعد فترة ولأسباب اقتصادية سابت أسرة عمر أسيوط وهجت على القاهرة، وفى القاهرة بدأ يغنى فى الأفراح الشعبية، ويركب النكتة على الأغنية على الموال على الاستعراض لحد ما صنع تركيبته المميزة.
ورغم أن طلة عمر للوهلة الأولى توحى لك أنه إنسان بسيط، وحياته مرت بهدوء كما القطر القشاش، إلا أن الحقيقة كانت عكس كده تماما.
غنى عمر الجيزاوى، أكتر من ألف مونولوج متسجلين فى الإذاعة، وسبق وخاض تجربة تقديم البرامج وقدم برنامج "على شط النيل" وبرنامج "نواعم" مع تحية كاريوكا.
عمر الجيزاوى، كمان كان سباق وقدم الفرانكو أراب فى أغنية "يا ميت ندامة على اللى حب ولا طالشى"، ووصل للعالمية، لدرجة إن فرنسا كرمته وحطت صورته على علب الكبريت، ووصل الاختلاف معاه لأخره ووصل إلى أسامى ولاده، اللى اختار لهم أسماء "فرفش، أسرار، تحفة، جلاء".
وزى ما كانت حياته مختلفة، كان موته برضه مختلف، ولك إن تعرف أن الجيزاوى مات مرتين، الأولى لما وقع فى الترعة بالعربية وفضل فى المياه فترة من الوقت قالت بنته عنها إنها وصلت لـ13 ساعة، ولما نقلوه المشرحة، دخل عليه دكتور يعاين الجثة عشان يكتب تقرير الوفاة، فلقاه بيقوم قدامه، واتصاب الدكتور وقتها بصدمة ومات الدكتور وعاش عمر.
أما المرة التانية، اللى مات فيها بجد فقالت عنها بنته أنه فى فترة العدوان الثلاثى سجل بصوته أغنية "يا اللى من البحيرة ويا اللى من آخر الصعيد"، لكن الموسيقار جمال سلامة خد المذهب كامل وأضاف له وأداها لشادية فى أغنية "مصر اليوم فى عيد"، ولما عمر عرف اتصاب باكتئاب وجلطة فى القلب عاش معاها 9 أشهر فى المستشفى لحد ما توفى فى 22 إبريل سنة 1983.
