«لا» مش هى الحل!

هناك طريقة صحيحة لاستخدام كلمة (لا) فى تربية ابنك، خصوصًا فى السنوات الأولى، من أجل عدم فقدان الكلمة معناها، وأيضًا لها بدائل.

مثلاً:
ابنك: عايز ألعب.
أنت: دا وقت المذاكرة.
تستكمل الحديث بالفعل: تعالى نذاكر ونخلص بسرعة عشان نلعب مع بعض أكثر ونتبسط أكثر.
وقتها، خذ الطفل مباشرة إلى مكان المذاكرة، ويبدأ مذاكرة بالفعل.
بدل ما بنقول (لا) طول الوقت.. احنا نفهمه الرفض، ونقنعه بالسبب، وفى نفس الوقت نبدأ مباشرة فى الفعل البديل إللى هو المذاكرة.
يعنى أنا ما ينفعش أقول (لا) لإبنى؟
الإجابة النموذجية.. ينفع طبعًا، بس احنا هنحوشها لمواقف أكبر
عشان ساعتها لما تقول (لا) الطفل يفهم إن دى درجة أعلى من الرفض
زى مثلاً أنه يترك إيدك ويجرى فى الشارع
أو مثلاً يقرب من شىء ساخن ممكن يلسعه أو يحرقه لا قدر الله

احنا محتاجين هنا نعرف إن الطفل لما بتستخدمى معاه كلمة (لا) بكثرة بيحصل عنده خلط.. مش بيكون فاهم إنك رافض الموقف مش رافضة هو شخصيًا.. ودا تفسير بكاء الطفل لما بتقوليله (لا).
بعد كدا، عند وصول الطفل لسن 5 سنوات، ضرورى جدًا أكون علمته، أيوه علمته، إزاي وامتى يستخدم كلمه (لا).
الطفل لازم تعلمه وما تسيبوش يتعلمها لوحدة.. إن لما حد يضربك ابعده عنك وقوله (لا) ما تعملش كدا.
إن لما حد يلمسه، لمسه غير مريحة، يقوله (لا) ويصرخ بصوت عالى، ويترك المكان ويبلغ أمه أو أبوه.
ولما حد يسخر منه أو يتنمر عليه.. يقوله (لا) ما اسمحلكش تتكلم عنى بالطريقة دى.
يعنى أنا لما أعلمه يقول (لا) أكون بحميه من التنمر والتحرش والاستغلال والتعنيف؟
كلمة (لا) هى سلاح ذو حدين، لازم نستخدمه صح ونعلم أولادنا يستخدموه صح.
احنا مش بنربى ولادنا علشان يقولوا حاضر بس.. احنا بنربيهم يعنى بعلمهم يفكروا يعنى بنعلمهم يفهموا أنفسهم ويفهموا أصحابهم وأهلهم والناس حواليهم.