كريم شعبان
ويجي شوية من بتوع "افتحوا الحدود يا مصاروة باش نحرر فلسطين"، وبتوع جهاد الكيبوردات، يزايدوا على موقف مصر.. العالم كله جه وشاف المعبر وهو مغلق من الجانب الفلسطيني بفعل القصف الصهيوني، ورغم كدا مصر عملت المستحيل وضغطت واستخدمت الورقة بتاعت إخراج الأجانب مقابل دخول المساعدات، ونجحت في ده.
الدكتور ضياء رشوان من فترة وقف أمام المعبر، وقال للمنظمات الدولية المعبر مفتوح واللي عايز يدخل يتفضل بس مصر غير مسؤولة ايه اللي هيحصل بعد عبور بوابة مصر، ودخول الجانب الفلسطيني.
سهل على مصر تدخل المساعدات مباشرة بدون تنسيق، بس بعد لحظات الجانب الفلسطيني من المعبر هيضرب زي ما حصل بعد 7 أكتوبر، وبعد ما كنت بتدخل 100 شاحنة مثلا في اليوم، وتضغط عشان تدخل العدد الأكبر، مش هتدخل ولا شاحنة ومعاناة الفلسطينيين هتزيد يوم بعد يوم.
طيب وأنت بتكتب وبتزايد على موقف مصر، عندك معلومة إن إسرائيل عايزة جهات دولية هي اللي تدير المعبر من الجانب المصري، لأن عندها إحساس إن مصر بتسمح بتهريب الأسلحة إلى غزة، ومستحيل مصر تسمح بإدارة أجانب لمعبر مصري، زي موضوع التهجير كده.
التعليقات على اتهام مصر بمنع دخول المساعدات تخوف، الخصومة السياسية خلت البعض ينكر اللي بيشوفه بعينه يعني ممكن يكدب عينه وهي بتشوف سيارات المساعدات وهي بتدخل غزة، ويصدق كلام مرسل عشان بس يقول شوف مصر بتعمل إيه، طيب هل تعلم إن ثلثي المساعدات اللي دخلت غزة هي مساعدات مصرية خالصة من الشعب المصري، في حين العالم كله قدم الثلث الباقي.
مصر من فترة اتهمت إسرائيل بعرقلة دخول المساعدات، لأن إسرائيل كدولة احتلال قالت هندخل اللي عايزين ندخله، وهيروح يتفتش في معبر كرم أبو سالم وبعدين ندخله.. طيب أنت قررت تدخل مباشرة عارف ايه اللي هيحصل في المعبر من الجانب الفلسطيني، ارجع لما بعد 7 أكتوبر وأنت تعرف.
الأدلة كتيرة على المساعدات المصرية لغزة، ولو كتبت على يوتيوب هتشوف بعينك وهي بتدخل، ومحدش قادر ينسى فرحة أول شاحنة دخلت غزة بعد ما المعدات المصرية دخلت رصفت الطريق في الجانب الفلسطيني، ولو سألت أي حد راح عند المعبر هيرد عليك.
حد يقولي هل اللي صدعونا بجملة "افتحوا الحدود" بعتوا طيارة واحدة فيها مساعدات لأهل غزة؟، يا ريت اللي بيزايدوا على موقف مصر يطالبوا حكوماتهم بنفس اللي بيطالبوا به مصر ويشوفوا حكوماتهم هتعمل إيه.
للأسف فيه ناس بتحب تستعمى عشان تثبت وجهة نظرها.. ودول ربنا معاهم.
