طارق يحيى : أخطرت الإدارة بحاجة اللاعبين لراحة أسبوع قبل مباراة الرجاء

وجه طارق يحيى المدير الفنى لنادى الزمالك، اليوم الثلاثاء، الاعتذار لجاهير النادى بعد الهزيمة التى تلقاها الفارس الأبيض أمام أسوان فى الجولة الماضية من الدورى الممتاز.

وقال طارق يحيى خلال المؤتمر الصحفى لمباراة نادى طنطا: "باعتذر للجمهور باسمى واسم الجهاز ومجلس إدارة نادى الزمالك عن مباراة أسوان، اتعرضنا لنقص كبير فى اللاعبين كان فى غياب 11 لاعب، ودخلت التشكيل حازم إمام وكاسونجو على عكس رغبة طبيب النادى وكان صعب أبدأ بيهم لأنهم مصابين من حوالى شهر".

وأضاف المدير الفنى لنادى الزمالك: "النهاردة كنا أفضل وأشكر اللاعبين على الأداء، اللاعبين مجهدين جدًا وضعط المباريات كبير، وبلغت الإدارة حاجة اللاعبين لراحة قبل مباراة إفريقيا على الأقل أسبوع أو 10 أيام".

وتابع: "أنا باحافظ على وصافة الدورى وفى نفس الوقت باحضر اللاعبين للفترة المقبلة، أنا مباشتغلش لنفسى باشتغل للمرحلة اللى جاية، علشان لما نروح مباراة الرجاء يكون المستوى البدنى مطمئن".

وعن تحسن الأداء الهجومى لوسط ملعب الزمالك، قال طارق يحيى: "الأهداف مبتجيش غير من كرة عرضية أو تسديد ومتابعة، دائمًا باعمل وحدة تصويب فى التدريبات، وباشدد على ضرورة التسديدات، مفيش لاعب نص ملعب دلوقتى إلا ولازم يسدد".

وأضاف: "إحنا بنشتغل على الكرات الثابتة وده جزء مهم جدًا فى شغلنا، الضربات الركنية كلها النهاردة الحمد لله عملناها بشكل إيجابى، أما عن عدم الدفع ببن شرقى فى بداية المباراة لأنه جاهز بدنيًا بنسبة 60% ومكنش ينفع يلعب بشكل أساسى، وأنا كنت ناوى يلعب نص ساعة بالكتير، لكن مسار المباراة أجبرنى على الدفع بيه مع بداية الشوط الثانى".

وعن قدرة لاعبى الزمالك على التأقلم مع المدرب الجديد، قال: "لاعيبتنا لاعيبة كبيرة ولاعيبة منتخبات، الجزء الفنى مهم لكن الناحية النفسية مهمة جدًا فى المرحلة دى، الكام يوم اللى اشتغلتهم عملنا شغل كويس، واللى طلع فى الماتش النهاردة جزء صغير منه ليا، والباقى لمستر كارتيرون قبل ما يمشى واللاعيبة طبعا".

وتابع: "لاعيبة الزمالك تشتغل فى أى ظرف وأى وقت ومع أى مدرب، تنفيذ التعليمات وصل معايا لحد 85%، وكلهم بيستجيبوا بشكل كبير لكن لازم نعذر كل لاعبى الدورى نظرًا للضغط، بس عندنا الأمور صعبة بسبب الغيابات".

واختتم حديثه: "أنا متابع الرجاء من قبل وجودى كمدير فنى للزمالك، أنا من الناس القليلين اللى بيفضلوا مصلحة النادى على مصلحتى الشخصية، كل اللى بيقول باشتغل 3 أيام ولا ساعة ميفرقش معايا، ويكفينى إن جمهور الزمالك شايف ده".