إسعاد يونس
وقالت إسعاد: "مجدى عاطف اسم لمواطن مصرى واحد من ملايين المواطنين المصريين زىّ وزيك من الوشوش اللى بنشوفها حوالينا كل يوم، لكن حكاية مجدى حكاية أصعب من تخيلها، حكاية دفع فيها تمن قاسى جدا خلال سنين عمره، عشان غلطة بسيطة ومبلغ أقل بكتير من أن الإنسان يتسجن بسببه يوم واحد بس، آه والله زى ما بقولك كدة".
وأضافت: "مأساة عم مجدى بدأت قبل سنة 2002 بشوية رجل بسيط عايز يشترى أجهزة بسيطة للبيت، غسالة تلاجة بوتجاز، كدة يعنى، كل اللى خده مجدى كان 2800 جنيه فقط لا غير، لكنه مكنش بيملك المبلغ ده، رجل بسيط ودخله أبسط، ميقدرش يدفع المبلغ ده مرة واحدة، فقلولوه ممكن تشترى بالقسط ولأنه رجل خبرته على قده، لما اشترى الحاجات دى مضى على شيكات كلها على بياض، هو مكنش يعرف يعنى ايه شيك على بياض أصلا ويعنى إيه يمضى أكتر من شيك".
وأوضحت: "اللى حصل أنه اتاخر فى كام قسط فالشيكات اتوزعت على أكتر من محافظة، وكل محافظة اترفع فيها قضية بشيك، واتحكم على عم مجدى بأحكام مختلفة فى كل قضية، مجموعها إيه بقى يا حبايبى، 96 سنة سجن عشان 2800 جنيه، عم مجدى معرفش يعمل إيه وفضل يتنقل بين المحافظات على أمل أنه يلاقى مخرج هنا أو هناك وأسرته طبعا اتفككت وابنه اللى لسة مكملش 4 سنين بعد عنه وفى النهاية حصلت النتيجة الحتمية، اتقبض عليه وبقى المفروض يقعد فى السجن لحد ما يجى قدر ربنا، يا رب اديله الصحة وطولة العمر".
واستكملت: "مين ممكن يهتم بحالة عم مجدى وآلاف زى عم مجدى، قصصهم متشابهة تختلف فى تفصيلة هنا يعنى تفصيلة هناك، لكن مصيرهم فى النهاية كان السجن بسبب حاجات بسيطة، أو خلينا نقول متستهلش أبدا أن الإنسان يقضى بقية عمره فى زنزانة وأسرته تتشرد ويضيع المواطن ده كده وجنبه يضيع 5 مواطنين".
وتابعت: "مشروع الغارمين من مؤسسة مصر الخير قدر يعرف قصة عم مجدى، عرفوه أمتى؟ سنة 2010، بعد ما عدى عليه فى السجن 8 سنين، بس إيه بقى كان فى مشكلة تانية غير المبلغ، اللى هى القضايا اللى عليه اللى اتوزعت على ورثة كتير، 17 وريث فى حتت مختلفة وطبعا محدش فيهم ملتفت ان اسمه مرتبط بقضية على شيك بمبلغ بسيط، فكانت رحلة البحث عن الورثة وتخليص الإجراءات الإدارية والأوراق رحلة أخدتلها كمان 7 سنين، أخيرا قدرت مصر الخير أنها تاخد حكم بالإفراج عن عم مجدى بعد أن قضى فى السجن 15 سنة فى زنزانة عشان 2800 جنيه خلال الفترة دى قدرت مؤسسة مصر الخير أنها تفك من خلال مشروع الغارمين كرب 50 ألف عم مجدى، 50 ألف مواطن ومواطنة، شاء حظهم الصعب وقلة خبرتهم أنهم يروحوا ضحية لتعثرهم فى سداد فلوس بسيطة مسرقوهاش كل واحد فيهم كان نفسه يستر بنته أو يشترى جهاز بسيط فى بيته، غسالة تساعد أم بسيطة، تلاجة تحفظ أكل لأسرة، أو حتى سرير ودولاب يناموا عليه، يا رب أى حد زى عم مجدى لسة مقدرناش نخليه يشوف النور ويلم شمل عيلته من تانى، يا رب يخرج فى أسرع وقت".
