مشروع جسر

وقالت إسعاد: "المثل بيقول إيه، ولاد الحرام مخلوش لولاد الحلال حاجة، إيه المثل ده؟ يجى واحد مش كويس يتصرف تصرف سلبى ويخدع الناس فى حاجة فيخلى الناس تفقد الثقة فى أى حد يعمل الحاجة دى، طب هدى لحضراتكم مثال كلنا شوفنا وسمعنا وقرأنا أخبار اللى من نوعية طالب ابتدائى مش عارف منين يخترع آلة تصل التاريخ فى 10 دقائق أذكى طفل فى العالم بيخترع براية بالطاقة الذرية واستيكة بأشعة الليزر، حاجات من دى كتير، هى مضحكة مبكية، وبتخلى الناس تفقد الثقة فى كلمة اختراع وبحث علمى وابتكار من أساسه".

وأضافت: "ييجى بقى مجموعة شباب بجد عندهم فكرة حقيقة فى مجال واقعى، عايزين يستكملوا عشان يقدروا يطوروا فكرتهم، اللى هى فعلا قابلة للتنفيذ، وللأسف الشديد ميلاقوش حد يسمعهم، لأن الناس فعلا فقدت الثقة وبقت الموضوعات دى تثير السخرية مش بتثير الاهتمام، مش مهم دلوقتى نفكر فى الأسباب اللى بتخلى الأخبار دى تنتشر وأننا نواجهها إزاى، لأن دى حاجة صعبة ومعقدة، ونتائجها قليلة، فعايزين طريقة نهتم من خلالها باللى عندهم رغبة بالبحث العلمى الحقيقى وعندهم حاجات واقعية مفيدة يعملوها، يستفيدوا منها ويفيدوا اللى حواليهم".

كما أوضحت: "إزاى نلاقى الشباب دول؟ إزاى نتواصل معاهم؟ إزاى نوفر لهم سبل تخليهم يستكملوا أبحاثهم بشكل علمى سليم، باختصار عايزين جسر يبقى واصل بينا وبين الشباب دول عشان كدة مستغربتش لما عرفت أنه من ضمن مشروعات مؤسسة مصر الخير، اللى أنا شخصيًا مهتمة بها جدًا، مشروع كدة اسمه جسر، المشروع ده قائم على الاهتمام بالبحث العلمى والابتكارات، المشروع بضم تجمع من الشركاء والأنشطة بهدف حل مشكلات مصر الاجتماعية فى مجالات الطاقة والمياه الصحة الغذاء التعليم وده من خلال دعم الابتكارات وسيادة الأعمال وكما بيقدم أنشطته من خلال حاضنة أعمال ومعمل ابتكارات وشبكة استثمار مجتمعى".

واستكملت: "سيبك من الكلام النظرى ده وخلينا نسأل هل المكنة طلعت قماش؟ هل حصل حاجة فعلية على أرض الواقع؟ بسم الله الرحمن الرحيم الإجابة نعم، أيون حصل يعنى فى مجموعة من شباب الصعيد اهتموا بحصاد القصب، عشان يوفر جهد ووقت ويعلى الإنتاج وده قدروا يوصلوا فيه لفكرة تطوير مكنة للحظ، واتنفذت الفكرة فعلا فى إطار مشروع جسر باسم زعزعة، وفى شباب تانيين اشتغلوا على فكرة أن مخلفات القصب لمادة نافعة تستخدم فى سماد عضوى واشتغل على مخلفات محاصيل تانية غير القصب واسمه ايه؟ برمودة ده المشروع، شباب تانيين قدروا يستخلصوا مادة من قشر الجمبرى، القشر اللى بنرميه ده، المادة دى بقى بتستخدم استخدامات طبية عديدة منها تصنيع الأدوية المضادة للبكتريا اسمه ريشريمب ده اسم المشروع".

وتابعت: "وفى شباب اشتغلوا على استغلال الطاقة الشمسية فى حاجات بسيطة منها مثلا كشافات إضاءة تصنيع مكينة رى بسيطة وده كمان مفيدة جدا للبيئة وترحمنا من التلوث اسمها صن سيتى، جرين لايت مثلا دى بتعمل كشافات إضاءة بتعمل بالطاقة الشمسية بسعر مناسب للمناطق الفقيرة، الحقيقة أن أغلب المشروعات فى مشروع جسر مشروعات مفيدة وحاجات ضرورية جدا، بس للأسف صوتها ضايع وسط كمية الأخبار اللى مش معقولة، المهم أن شبابنا دول لاقوا اللى يفتحلهم دراعاته ويحتضنهم ويوفر لهم اللى محتاجينه، وهو ده المهم، آه والله زى ما بؤلك كده".