وصلة مياه

وقالت يونس "اتكلمنا كتير عن مصر الخير، مشروعات مصر الخير، جهات التعاون مع مصر الخير، متطوعين مصر الخير، شركاءهم وأفكارهم، مشاريعهم المستقبلية وغيرها، بس كمؤسسة مجتمعية قايم نشاطها كله على التبرعات، فكركم أغلى تبرع جه لمصر الخير كان إيه، الموضوع مش كام، مش بنتكلم فى الغلو، فى قيمة التبرع المعنوية، كل جنيه بيروح لمصر الخير أو أى مؤسسة خيرية وتنموية فى مصر، هو تبرع غالى ومهم ومؤثر فى حياة ملايين البشر، بس التبرع ده كان له قيمة مختلفة، التبرع كان من مجموعة أطفال، كلهم إخوات، واتبرعوا بتكلفة وصلة مياه، آه والله زى م بؤلكم كده، مجموعة أطفال حوشوا وجمعوا كل الفلوس اللى معاهم وقاموا بالتبرع بيها لعمل وصلة مياه، كان هدفهم من التبرع صدقة جارية على روح والدهم الله يرحمه ويغفرله، يا زين ما ربيت يا عم والله، سألنا واحد من الأطفال المتبرعين دول إشمعنى يا حبيبى وصلة مياه، رد قال، أصلنا فى رمضان بنقدر نستحمل الجوع بس اللى بيتعبنا قوى هو العطش، والمياه لما بتتقطع ساعتين فى البيت بتبقى مشكلة كبيرة قوى، ما بالكم بقى باللى معندهمش ميه فى بيوتهم أصلا، شوف الوعى والفطرى السليمة اللى عند الطفل ده، تعرفوا أنه فى مصر فى أكتر من 6.5 مليون مواطن معندهمش وصلات ميه فى بيوتهم، و13.5% من الأسر المصرية فى الأرياف معندهمش وصلات ميه، و1.5% من الأسر المصرية فى المدن معندهمش وصلات مياه، 1.5 مليون مواطن بيعتمدوا فى الشرب على مياه العربيات والحاويات".

وتابعت يونس "الأرقام كبيرة وبتبين معاناة ناس معانا على نفس الأرض بس بيعيشضوا الحرمان من سبب الحياه الرئيسى وهو نقطة المياه النضيفة، مؤسسة مصر الخير من المؤسسات الرائدة فى مجال توصيل المياه للأماكن الأشد احتياجا، وفى الاتجاه ده بيقوموا بمجموعة مشاريع منها إيه بقى، مد الشبكات الرئيسية للمناطق المحرومة، دق الآبار الارتوازية فى الأماكن المحرومة فى قرى صعيد مصر، إعادة تأهيل محطات المياه، وإنشاء محطات الرفع والتحلية، ده بقى إلى جانب آلاف الوصلات المنزلية اللى تم إنجازها، المياه النقية".

وأكلمت: "وخللوا بالكم من كلمة النقية دى، لأن بقدر ما المياه بتحمل الحياه، فالمياه الملوثة مبتشيلش حاجه غير الموت، أمراض المياه ملهاش حصر، إيشى محمولة بالمياه وإيشى مجروفة بالمياه، وإيشى أمراض تعيش فى المياه، وإيشى أمراض تحملها الحشرات المائية جوه المياه، علشان كده مصر الخير من أهم أهدافهم هو توصيل المياه، والحفاظ على نقاء الميه دى وعلشان يحسنوا المناخ الصحى العام للمكان اللى بتوصله الميه دى، مياه نضيفة يعنى حياة آمنة، ده المبدأ اللى بتشتغل عليه مصر الخير فى مشروع وصلات المياه، صدقونى توصيل الحياة الآمنة من خلال ماسورة الميه هدف أسمى حتى من إننا نتكلم عنه ونعدد ونفند فى مزاياه، دى بديهيات كده، أه والله بيديهيات زى مابؤلكم كده، إيدكم معانا ومع مصر الخير، ناخد من الأطفال اللى اتبرعوا بمصروفهم علشان وصلة ميه، ومرضوش حتى أن مصر الخير تكملهم على تبرعهم وأصروا تكون التكلفة بالكامل من فلوسهم، ناخدهم قدوة ومثل أعلى، ويلا نوصل حياه وحياه آمنه كمان لكل أهل مصر".