إسعاد يونس
وقالت: "كل سنة بيحتفل اليونسكو 18 ديسمبر باليوم العالمى للغة العربية .. كتير مننا ميعرفوش المعلومة دى.. اللغة العربية واحدة من أكثر اللغات انتشارًا على وجه الأرض، وعدد الناس اللى بتتكلم باللغة العربية واللى اللغة العربية لغة تانية عندهم وصل لنصف مليار شخص.. صحيح أغلبهم متركزين فى منطقة محدودة من الأرض من المحيط للخليج، ولكن المهاجرين العرب وصلوا للقطب الشمالى والأقصى جنوب الأرض مسبوش منطقة فى العالم مسكنوهاش.. وبالتالى راحوا بلغاتهم معاهم ونشروها".
اضافت: "من ناحية الأحداث اللى بيشهدها العالم دلوقتى وإلصاق التهم للمسلمين بالإرهاب بقى ناس كتير من الغرب مشتاقين يعرفوا عن العرب والمسلمين.. عندهم فضول يعرفوا كده.. حاجة غربية جدا، فبقى ناس كتير بيتعلموا عربى وبيحاولوا إنهم يتقنوه كمان.. لدرجة إننا بنلاقى دوبلوماسيين كبار النهارده بيتكلموا بالعامية الشعبية المصرية ولا أجدعها مؤلف أغانى مهرجانات.. اللغة العربية فى تاريخ مصر متعتبرش من اللغات القديمة أوى أتقنها المصريون بعد دخول العرب مما يقرب من 1000 سنة وكسور مئوية.. إلا أنها اللغة الأكثر انتشارًا اللى تكلمها المصريون لأن مصر على مدار تاريخها فيها تعددية لغوية.. إقليم تلاقيه بيتكلم لغة وإقليم تانى بيتكلم لغة منشقة من لغة تانية".
وتابعت إسعاد يونس: "المصريون أبدعوا فى كل حاجة ليها صلة باللغة فأهم مسرح عربى كان مصر وأهم سينما فى مصر.. أمير الشعراء من مصر أهم كتب كانت فى مصر وأهم كتاب كانوا من مصر.. نوبل الوحيدة فى الأدب العربى كانت لمصر.. أهم قصاصين وأهم روائيين من مصر.. قمم الصحافة العربية كلها كانت من مصر".
واستطردت: "حدوتة اللغة العربية لا تنتهى حدوتة تخلينا مهتمين بلغاتنا وثقافتنا العربية تخلينا منلومش ولادنا إنهم بيتكلموا عربى.. مش وحش إننا نتعلم لغات تانية كتيرة بس الوحش إن لغتنا نُعرج فيها.. عيب أوى تكتب لكن بلام ألف وترد على غيرك بكلمات مش عربية عيب أوى".
