ثقافة الإجازة

وقالت إسعاد: "إحنا ناس مابنعرفش نأجز يعنى إحنا ملناش فى الإجازات مش عشان مقطعين روحنا حب وهيام فى الشغل، لا إحنا بس معندناش ثقافة الإجازة من أساسها، يمكن لأن جزء كبير مننا، الدنيا بالنسبة له إجازة طويلة بيقطعها مرواح للشغل يعنى نوع من الواجبات الاجتماعبة التقيلة، المهم ده بقى لما بيجى عليه يوم إجازة سواء إسبوعية أو عيد أو سنوية مش بتفرق معاه أصلا".

وأضافت: "فى ناس بتقضى إجازتها فى مرازية أهل بيته يعنى يفطر وينزل يصلى الجمعة ويرجع جرى عشان يرازى فى عياله شوية ويرازى فى المدام شويتين وممكن برضو يرازى فى جيرانه ويقوم يتصل بأصحابه يرازى فيهم وهكذا، وينتهى يوم الإجازة فى لقطة هى الألطف فى فنون تسويد العيشة، مش بيختلف الوضع كتير فى الإجازة السنوية ولتكون مثلا المصيف، بتلاقى ذات نفس المرازية بس اتنقلت من البيت إلى واحدة من المدن الساحلية، وممكن المرازية تاخد دواير أوسع، قوم بدل ما المواطن والمواطن يرازوا فى بعض وفى عيالهم يرازوا فى البلد وفى الفندق والسياح وأى كان حى أو جماد يتصادف تواجده حوالين هذا المواطن".

كما أوضحت: "الإجازة كمان دائما مرتبطة بالأكل زيها زى أى مناسبة بنحتفل بيها، الأمر عندنا مش بيخرج عن اعتبارات الأكل، فتلاقى بمجرد ما تجى سيرة الإجازة أو الفسحة، طوارئ عند البقالين، نقص رهيب فى مخزون الدولة من الجبنة الرومى والبيض واللانشون والبسطرمة، لو الموضوع فى بحر بقى معروف أن البحر بيجوع، ففى الحقيقة بلاقى اهتمام مضاعف للدعم الغذائى ومتفهمش الارتباط الشرطى اللى بين المكرونة أم صلصلة والبحر".

وتابعت: "منظر الطفل البرئ اللى بيضرب طبق مكرونة بالصلصة والصلصة كتير بالمناسبة من أكتر المشاهد الكلاسيكية على الشواطئ المصرية، شقتين بطيخ، كوبايتين شاى، وناخد بعضنا ونرجع، إجازات الأعياد وشم النسيم و6 أكتوبر وتحرير سينا وعيد العمال الموضوع مش بيختلف كتير، وأدائنا فى الإجازات بيتراوح بين ضرب الكحك أو اللحمة أو الفسيخ للعودة للأنتخة والمرازية".

وأضافت: "بس الإجازات بقى مش كدة ولا معمولة لكدة، الإجازات معمولة عشان تفصل فيها يا جدع، قوم دماغك تهدى وجسمك يهدى وتقدر على اللى جاى، مش منطقى أبدا أن الوقت اللى تريح فيه تقعد تمارس أى مرازية فى خلق الله، أو إنك تفضل تمارس رياضة البحلقة فى السقف، مايجراش حاجة يا جدع من كوبايتن شاى ساعة العصارى، نزولة كدة مع العيال أو الصحاب وماله".

واستكملت: "القصد يعنى أننا نفهم أن الإجازة مش يوم تزود فى من أعبائك سواء المادية والذهنية كل بلاد ربنا يعرفوا يشتغلوا صح، عشان بيعرفوا يإجزوا صح، مش هقولك يوم الإجازة خد المدام والأطفال وأطلع أعمل skating على التلج، ولا تسلق الجبال بس استمع بوقتك يا أخى أعمل حاجة حلوة اتمشى شوف ناس من طينك، ماتتخانقش وتقضى اليوم على الكنبة قصاد التلفزيون، أقولك على الكلمة السحرية انبسط من غير تعقيد شوفت سهلة إزاى".