إسعاد يونس
وقالت إسعاد: "ماخبش عليكوا من كام يوم كنت فى زيارة للحكيم، حبة رهان وكرشة نفس ولحاجات اللى بالكوا فيها دى يبعدها عن السامعين أجمعين، المهم بعد الكشف والإشاعات والتحاليل يجى دور الروشتة اللى بتتكتب باللغة الهيراطيقية، فى أغلب الأوقات بمعجزة ما، الصيادلة ربك بيحط البركة ويفهموا النقوش البديعة دى ويستنتجوا الأدوية".
وأضافت: "القصد خلصت الروشتة وجه معاد النصايح، بتاعة النوم بدرى وغسيل الرجلين قبل ما ننام وشرب المايه الكتير وبعدين نصايح الأكل من نوعية: هنبعد عن المقلى والمشوى والمسلوق والدهون والخضار واللحمة والبيض والسمك والنشويات والكاربوهيدرات والعيش الأبيض والبنى والأحمر والأسود والخضار والفاكهة ومنتجات الألبان والباقى ناكله زى ما إحنا متعودين بس بلاش ملح وسكر وتوابل وخل وليمون وفلفل، غير كدة براحتك".
وأوضحت: "المهم، استغفر اكتم وأقول معلش يا بت أهو دور ويعدى، ونكتفى بسندوتشات ماية الحنفية، وربنا يطرح فيها البركة ونبقى منضغ حبة هوا لما نجوع، وبعدين يستطرد الحكيم المداوى: وطبعا نبعد عن التوتر خالص خالص الفترة دى، نعم!، التوتر يا فندم لازم نبتعد عنه خالص، آه اللى هو إزاى، توتر إبه اللى نبتعد عنه؟، نبتعد عنه بمناسبة إيه؟، ده النفر بيتولد والتوتر طالعله أتب فى ضهره، ابتعد عن التوتر اللى هو منزلش الشارع، ماسمعش كلاكسات تخلى الواحد يصنج كأن العربيات بتمشى بالزمامير مش بالبنزين".
واستكملت: "ولا ابتعد عن التوتر وماروحش الشغل؟ ولا ابتعد من التوتر اللى على السوشيال ميدا، تفتح التليفزيون على غيار الريق تلاقى 400 خبر ناطين فى خلقتك عبارة عن كوارث اجتماعية واقتصادية وتقافية وطبيعية وأينعم بعد نص ساعة بيبقوا بح ما بين إشاعات وما بين صياغة لطيفة تحسسك أن اللى بيخبط عليك عالباب ده الباشمهندس فرانكشتين شخصيا بينما هو مرات عم على البواب جايبة العيش".
وتابعت: "بس كفاية الخضة بتاعة الصياغة لوحدها اللى مش توترك بس، دى تجبلك اكتئاب وهواجس قهرية ده غير الناس اللى لوحدها كدة استنتجت استنتاج ما تاخد قرار إنك صوابعك فى الفيشة الكهربا من هول الصدمة يجيلك هاجس ساذج إنك تساله مصدر الخبر إيه؟ يقولك لا مفيش مصدر ده رأيى!".
واختتمت: "كم المحللين والمستنتجين والفقهاء العلميين والفنيين والتقنيين اللى بتصدرهولنا السوشيال ميديا مش يجيب توتر ده يجيب جدرى، نبعد عن توتر الأسعار ولا توتر الدولار وناس زى المنشار؟ نبعد عن توتر الإرهاب ولا بطالة الشباب ولا وجع الركاب؟، ما تقوللا يا عم الحكيم البعد عن التوتر ده بيصرفوه منين وأنا ابعت اجيبه ولو بواسطة بدل التوتر اللى انت عملتهولى ده".
