إسعاد يونس
وقالت إسعاد: "فى واحدة من جلسات التصفح الإلكترونى غير الهادف فجأة يصدمنى إعلان فى دولة ما من دول ما عبر المحيطات.. حاطين صور قطة فى متجر إلكترونى لبيع الحيوانات الأليفة.. مفيش عمار بينى وبين أى حاجة فيها 4 رجول.. مهتمتش أوى بصورتها لكن اتصدمت لما عرفت إن سعرها 400 دولار.. ليه؟ دول أكثر من الهم على القلب فى الشوارع..السعر ده صحَّا كل الفران اللى فى عبِّى عن القطط".
أضافت: "طلَّعت التليفون واتصلت على صديقة لى عايشة فى بلاد الفرنجة ومهتمة بالحاجات دى.. مضروبة بالقطط والسحالى وكل حاجة بتنط.. فردت علىَّ وقالتلى أيوه فيه قطط اسمها ماو، ودى أغلى حيوان أليف.. الناس هنا بيحبوها موت علشان ذكية متسببش حساسية للأطفال، وكمان طبعها هادى، وبتحب اللعب والحركة مش بروطة، وتمنها ميقلش عن 200 دولار.. أنا جه فى بالى موقعة مذبحة القطط اللى كانت فى النادى الفلانى، وموقعة البسة.. اللى كانت فى المحافظة العلانية.. والفضايح اللى على الجرايد عن عمايلنا فى مخلوقات ربنا".
وتابعت: "محدش فكَّر يهتم وينضف ويربى ويصدر ويرزق بدل من إهمال القطط.. دى ثروة كبيرة مرمية فى صفيحة الزبالة.. ده حتى هتريحنا من الزن والنونوة وقطع خلف العيال فى النوادى، وكمان هتكسب وترزق ونبقى بنصدر حاجة من نفسنا بس سيبوا شوية كده فى الشوارع علشان الفران فيه ناس بتحب الفران إحنا نصدر فران مع القطط أحسن".
