روز مارى
لحد باب مقفول وحياة بتبدأ وساعة بتجرى بدقات قلب خايف مرعوب من مستقبل وطريق مش معروف، لحد اثنين يمكن يكونوا حبوا بعض بس لسه معرفوش بعض، ودى أول صدمة من رحم الفرحة، أصلها دايما حلوة البدايات.
وبعد دقات الساعات وجرى الأيام وشهر عسل مليان أحلام، بتبدأ دقات القلب تهدأ من النهجان، ووسط جرى الحياة والسؤال المعهود بعد أول شهر مفيش حاجة فى السكة؟ والسؤال الأهم هل ضرورى من أول شهر يكون الحلم فى مولود جديد؟ أصل الفرحة وراها فرحة تعمل ربكة وقلق.
ويا ترى كل واحد فكر للحظة مع جرى الفرح وشوق الحب وحلاوة شهر العسل، إزاى هنبدأ الحياة؟ وهل نخطط لسنين العمر الجاى ولا كالعادة سيبها على الله وكله برزقه وديون الفرح تسدها فلوس نقوط الحبايب وكل عيل برزقه جاى؟
الاتكال على الله ولا التواكل مين فيهم طريقك فى الحياة؟ وأهم سؤال يا ترى بعد حلاوة البدايات هل عرفنا صفات بعض كويس؟ هل قادرين نسدد احتياجات بعض كويس؟ هل كل الاحتياجات تتلخص فى مصروف البيت؟ فين احتياجات الحب والحنان؟ هل مطلوب طرف يسدد وطرف يأخذ؟
وسط صعوبات الحياة والحلم ببيت مثالى التخطيط فيه أهم عوامل النجاح، هل نكمل الفرحة ونستقبل مولود جديد ولا نخطط الأول ونفهم ونسدد احتياجات بعض أصل الاهتمام والحب وقود الحياة؟
الحلقة الجاية هنعرف تفاصيل الحدوتة والحلم وصل لفين..
