تحدثت نور شلبي في حلقة جديدة من البرنامج المُذاع عبر موقع مبتدا، عن رحيل البرازيلي خوان بيزيرا، لاعب الفريق الأول لكرة القدم بنادي الزمالك، عن القلعة البيضاء، خلال فترة الانتقالات الصيفية الجارية.
وقالت نور: "ملف خوان بيزيرا دخل مرحلة الحسم اللاعب البرازيلي بقى قريب جدًا من الرحيل عن الزمالك، والوجهة الأقرب هي شباب أهلي دبي الإماراتي.. إيه اللي حصل؟!.. في الزمالك الأزمة المادية بتزيد يوم بعد يوم والمستحقات المالية المتأخرة للاعيبة بقت صداع في راس الإدارة.. عشان كده بدأ يبقي فيه أصوات داخل إدارة الزمالك.. خلاص نبيع بيزيرا ونفك الأزمة وندي للاعيبة فلوسها.. خصوصًا وإن اللاعب متمرد بقاله شهرين ومش موجود في مصر ومتغيب عن التدريبات".
وتابعت: "الزمالك من حيث الموافقة المبدئية على رحيل اللاعب بقت موجودة.. لكن الصفقة لسه ما اتحسمتش بشكل نهائي، من مصادرنا داخل الزمالك.. الاجتماعات عبر زووم مستمرة بشكل شبه يومي مع وكيل اللاعب ووالده ومحاميه عشان يحلوا الأزمة.. واللي حصل إن النادي الاماراتي بيستعد عشان يرفع عرضه للزمالك لـ5 مليون دولار، بالإضافة إلى مليون دولار متغيرات مرتبطة بأداء اللاعب.. مع احتفاظ الزمالك بـ20% من إعادة البيع.. يعني بنتكلم عن صفقة ممكن توصل قيمتها إلى 6 ملايين دولار، ده غير نسبة الـ20%".
